İsraillə 12 günlük münaqişədən sonra İran ölkə daxilində təzyiqləri artırır. “The Guardian” hesabatında qeyd olunur ki, iyunun 13-də İsrailin hücumu ilə başlayan və İranın cavabından sonra iyunun 24-də ABŞ-ın vasitəçiliyi ilə əldə edilən atəşkəslə davam edən toqquşmalar İranda genişmiqyaslı daxili repressiya dalğasına səbəb olub.
İyunun 23-də İsrailin Evin həbsxanasına hücumu nəticəsində 71 nəfərin həyatını itirdiyi xatırladılır. Sağ qalan bəzi məhbusların daha pis şəraitli həbsxanalara köçürüldüyü bildirilir.
Qeyd olunur ki, Məhsa Əmini etirazlarında iştirak etdiyi üçün həbs edilən fəal Rza Xandan partlayışdan sonra vəziyyəti daha pis olan həbsxanaya göndərilib. 60 yaşlı fəalın qızı deyir: “Nə atamın, nə də digər dustaqların çarpayısı yoxdur, döşəmədə yatmalıdırlar. Bir dəfə oyandı və yorğanının içində 6-7 yataq böcəyi tapdı”.
Qadın məhbusların da şəxsi əşyalarını belə özləri ilə apara bilmədən Qarçaq həbsxanasına göndərildiyi bildirilir. Edama məhkum edilən yardım işçisi Pakşan Əzizidən ən azı iki gündür heç bir xəbər alınmayıb. “Amnesty İnternational” təşkilatının məlumatına görə, Əzizi "dinc humanitar yardım və insan haqları fəaliyyətinə" görə cəzalandırılıb. Tehran administrasiyası onu “dövlətə qarşı silahlı üsyanda” ittiham edir.
Müharibədən sonra bütün İranda təhlükəsizlik tədbirləri dalğasının başladığı da bildirilir. Hüquq-mühafizə qüvvələrinin nəzarət-buraxılış məntəqələri qurduğu və çoxlu sayda insanın sosial şəbəkədəki paylaşımlarına görə həbs edildiyi bildirilir.
Məlum olub ki, “MOSSAD” İsrail-İran münaqişəsi zamanı Tehranda gizli pilotsuz uçuş aparatları bazası yaradıb. Kəşfiyyat qurumunun komandolarının hücumdan aylar əvvəl paytaxta sızdığı və əməliyyat zamanı İranın hava hücumundan müdafiə sistemlərini məhv etdiyi də müəyyən edilib. “MOSSAD” da hücumlarda casusların iştirak etdiyini təsdiqləyib.
İranın dövlət mediası ötən ay İsrail kəşfiyyatına işlədiyi iddia edilən 700 nəfərin ələ keçirildiyini bildirib. ABŞ-da yerləşən İranda İnsan Haqları Mərkəzinin (CHRI) məlumatına görə, 6 nəfər casusluq ittihamı ilə edam edilib. CHRI-dan Hadi Qayemi, “İran hakimiyyəti insanları heç bir əsas olmadan və vəkilləri ilə görüşmək imkanı vermədən həbs edir, sonra isə xalqı qorxutmaq və nəzarəti bərpa etmək məqsədilə onları “milli təhlükəsizlik” ittihamı ilə edam edirlər”, – deyib.
“The New York Times”ın təhlili də bizə xatırladır ki, Evin həbsxanası “insan hüquqlarının pozulması” səbəbilə gündəmdədir. Xəbərdə yazır ki, Tehran administrasiyası 12 günlük münaqişədən sonra tarixi yol ayrıcındadır. Orada bildirilir ki, İran daxili təzyiqləri artırmaq və gələcəkdə ölkəni dəyişdirməyə yönəlmiş siyasətləri həyata keçirmək arasında tərəddüd edə bilər.
