Neft qiymətləri ötən həftə 2023-cü ildən bəri ən böyük enişdən sonra enir.
Treyderlər Yaxın Şərqdəki vəziyyəti izləməyə davam edirlər. İranın Baş Qərargah rəisi Abdolrahim Musəvi həftə sonu İsraillə atəşkəsin uzunmüddətli davamlılığına şübhə ilə yanaşdığını açıqlayıb.
Banco.az xəbər verir ki, Brent markalı neftin sentyabr fyuçersləri Londonun ICE Futures birjasında 0,15 dollar (0,22%) ucuzlaşaraq bir barel üçün 66,65 dollar olub. Cümə günü Brent 0,11 dollar (0,2%) bahalaşaraq 66,8 dollar/barelə çatıb.
Bu vaxta qədər Nyu-Yorkun NYMEX əmtəə birjasının elektron hərraclarında WTI markalı neftin avqust fyuçerslərinin qiyməti 0,31 dollar (0,47%) ucuzlaşaraq bir barelə görə 65,21 dollar təşkil edirdi. Əvvəlki sessiyada müqavilənin qiyməti 0,28 dollar (0,4%) artaraq 65,52 dollar/barel olub.
Ötən həftə Brent 12%, WTI 11,3% ucuzlaşıb. Treyderlərin diqqəti hasilata avqustda qərar verəcək növbəti OPEC+ görüşünə yönəlib. İyulun 6-da baş tutacaq.
“Səkkiz” OPEC+ könüllü ölkəsi iyul iclasında hasilat kvotalarının sutkada 411 min barel daha artırılması imkanını nəzərdən keçirməyə hazırdır.
