ain.az, Bizimyol portalına istinadən məlumat yayır.
ABŞ Prezidenti Donald Tramp İranın ali dini lideri Ayətullah Əli Xameneinin İsraillə son 12 günlük müharibədə “qalib gəldikləri” barədə açıqlamasına sərt reaksiya verib. Tramp bildirib ki, əgər Tehran nüvə silahı proqramını yenidən işə salsa, ABŞ “mütləq” hərbi zərbələr endirəcək.
Bizimyol.info xəbər verir ki, cümə günü “Truth Social” platformasında paylaşdığı bəyanatda Tramp Xameneini “açıq şəkildə yalan danışmaqda” və “çirkin şəkildə” ABŞ və İsrailə qarşı böhtan atmaqda ittiham edib. ABŞ prezidenti həmçinin iddia edib ki, müharibə zamanı Xameneinin həyatını xilas edən şəxs məhz özü olub.
“Ölkəsi məhv edildi, üç əsas nüvə obyekti – Fordo, İsfahan və Natanz – tamamilə sıradan çıxarıldı. Onun harada gizləndiyini dəqiq bilirdim. Amma nə İsrailə, nə də ABŞ Silahlı Qüvvələrinə onun həyatına son qoymağa icazə vermədim,” – deyə Tramp bildirib.
Xatırladaq ki, İranın ali lideri atəşkəsdən sonra ilk çıxışında müharibədə “qalib gəldiklərini” bildirmiş və ABŞ-ın Qətərdəki hərbi bazasına endirilmiş raket zərbəsini “Amerikaya vurulmuş sillə” adlandırmışdı. Tramp isə bu iddianı “əsassız və yalan” kimi dəyərləndirib.
Bununla yanaşı, ABŞ Prezidenti bildirib ki, Xameneinin “qəzəb və nifrət dolu” ritorikası Vaşinqtonun sanksiyaların yumşaldılması istiqamətində apardığı diplomatik təşəbbüsləri dayandırmasına səbəb olub.
“Biz İran üçün sanksiyaların aradan qaldırılması və iqtisadi bərpa imkanlarını nəzərdən keçirirdik. Lakin Xameneinin bu bəyanatları həmin planlardan imtina etməyimizə gətirib çıxardı,” – deyə Tramp vurğulayıb.
Bununla belə, ABŞ kəşfiyyatına əsaslanan bəzi məlumatlar Trampın hərbi əməliyyatların miqyası ilə bağlı iddialarını tam təsdiqləmir. Sızan hesabatlara görə, İranın nüvə proqramına dəyən zərər, ehtimal ki, ölkənin texnoloji inkişafını yalnız bir neçə ay gecikdirə biləcək.
Trampın bu bəyanatları, Yaxın Şərqdə gərginliyin davam etdiyi bir vaxtda ABŞ-İran münasibətlərində yeni bir eskalasiya mərhələsinin başlanğıcı kimi qiymətləndirilib.
Qadir, Bizimyol.info
Daha ətraflı məlumat və yeniliklər üçün ain.az saytını izləyin.
