Dünyada ən çox istifadə olunan internet brauzeri olan "Google Chrome" artıq "Android"in iki köhnə versiyasında işləməyəcək.
Valyuta.az xəbər verir ki, brauzer seçimi əsasən istifadəçi vərdişlərinə bağlı olsa da, texnologiya nəhəngləri bazar payını artırmaq üçün daim rəqabət aparırlar. "Google" yaxın vaxtlarda "Chrome"un indiyə qədərkindən daha sürətli olduğunu iddia edib. Digər tərəfdən, "Microsoft" isə öz brauzeri "Edge"in reklamların qarşısını alma baxımından "Chrome"dan üstün olduğunu vurğulayıb. Bütün bu rəqabətə baxmayaraq, "Chrome" hələ də köhnə "Android" versiyalarında belə geniş istifadəçi bazasına sahibdir.
"Google" rəsmi bloq paylaşımında "Android 8" ("Oreo") və "Android 9" ("Pie") sistemləri üçün "Chrome" dəstəyinin sona çatdığını açıqlayıb. Brauzerin 139 nömrəli yeni versiyasının 5 avqustda təqdim ediləcəyi gözlənilir. Hazırda aktiv olan 137 nömrəli versiya nəzərə alındıqda, 138-ci versiya bu köhnə sistemləri dəstəkləyən sonuncu versiya olacaq.
Bu dəyişiklik o deməkdir ki, "Chrome"un yeni yeniləmələrini ala bilməsi üçün cihazların ən azı "Android 10" və ya daha yeni bir versiya ilə işləməsi tələb olunur. Brauzer köhnə sistemlərdə işlək qalacaq, lakin yenilənməyəcəyi üçün təhlükəsizlik boşluqlarına qarşı həssas vəziyyətə düşəcək.
Gözlənildiyi kimi, "Google" bu cihazları işlədən istifadəçilərə ən azı "Android 10" versiyasına keçməyi tövsiyə edir. Şirkət bu qərarın səbəbi kimi konkret açıqlama verməsə də, addımın arxasında köhnə versiyaların istifadəçi sayının azalması və daha çox insanı yeni versiyalara keçməyə təşviq etmək məqsədinin dayandığı güman edilir.
"Android 8" ("Oreo") 2017-ci ilin avqustunda təqdim olunub və 2021-ci ilin oktyabrında son təhlükəsizlik yeniləməsini alıb. "Android 9" ("Pie") isə 2018-ci ilin avqustunda istifadəyə verilib və 2022-ci ilin yanvarında dəstək müddəti bitib. Bu məlumatlara əsasən, "Google"un indiyə qədər bu versiyalar üçün "Chrome" dəstəyini davam etdirməsi əslində normaldan daha uzun bir dəstək müddəti təqdim etdiyini göstərir.
Paşa Məmmədli
