Şimali Koreya ABŞ-ın İrandakı nüvə obyektlərinə hücumuna sərt reaksiya verib. Şimali Koreya Xarici İşlər Nazirliyi bəyan edib ki, Fordo, Natanz və İsfahan obyektlərinə endirilən hava zərbələri “BMT Nizamnaməsinin və beynəlxalq hüququn açıq şəkildə pozulmasıdır”. Nazirlik gərginliyin daha da arta biləcəyi ilə bağlı xəbərdarlıq edərək, Yaxın Şərqdə qeyri-sabitliyin əsas səbəbinin İsrailin ekspansionist siyasətləri və Qərbin onlara dəstək verməsi olduğunu bildirib.
Şimali Koreya Mərkəzi Xəbər Agentliyinin (KCNA) məlumatına görə, Xarici İşlər Nazirliyi ABŞ-ın İranın Fordo, Natanz və İsfahan nüvə obyektlərinə hücumlarına reaksiya verib. Nazirliyin açıqlamasında "ABŞ-ın Birləşmiş Millətlər Təşkilatının (BMT) Nizamnaməsini və beynəlxalq hüququ pozan hücumunu şiddətlə qınayırıq" deyilir.
“Bu, İranın təhlükəsizlik maraqlarını pozdu”
Bəyanatda ABŞ-ın “İranın ərazi bütövlüyü və təhlükəsizlik maraqlarına təcavüz etdiyi” vurğulanıb və aşağıdakılar qeyd edilib:
“Yaxın Şərqdəki hazırkı vəziyyət beynəlxalq sülh və təhlükəsizliyin təməlini sarsıdan bir vəziyyətdir və İsrailin müharibə hərəkətləri və ərazi genişlənməsi yolu ilə öz birtərəfli maraqlarını həyata keçirmək üçün ehtiyatsız cəsarətinin və buna dözümlülük göstərən və təşviq edən Qərb tipli azad nizamın qaçılmaz məhsuludur”.
“İsrail və ABŞ-ın hərəkətlərinin mənfi nəticələri ola bilər”
Bəyanatda deyilir ki, İsrail və ABŞ-ın “sülhməramlılıq bəhanəsi ilə” Yaxın Şərqdə gərginliyi artıran hərəkətləri qlobal nizam üçün ciddi mənfi nəticələrə səbəb ola bilər.
ABŞ prezidenti Donald Tramp dünən İranın Fordo, Natanz və İsfahan nüvə obyektlərinə hava hücumu həyata keçirdiklərini açıqlayıb və bu əsas nöqtələrin "tamamilə məhv edildiyini" bəyan edib.
