Marko Yankoviç Bolqarıstan üzərində qələbədə pay sahibi oldu

“Qarabağ”ın mərkəz yarımmüdafiəçisi Marko Yankoviç futbol üzrə Monteneqro milli komandasının heyətində növbəti matçına çıxıb.

Arena.az xəbər verir ki, Monteneqro millisi ötən gecə yoxlama oyunu keçirib.

Sözügedən komanda səfərdə Bolqarıstanla üz-üzə gəlib. Yankoviç də bu görüşün iştirakçısı olub. Görüşə ehtiyat oyunçular skamyasından başlamış 31 yaşlı futbolçu 59-cu dəqiqədə Miloş Brnoviçin əvəzinə meydana buraxılıb. Yankoviç oyuna qoşulduqdan 9 dəqiqə sonra məhsuldar ötürmə ilə yadda qalıb. Məhz onun dəqiq ötürməsindən sonra Balsa Sekuliç topu tora qovuşdurub. Bu, matçda vurulan yeganə qol olub. Bununla da, görüş Monteneqro yığmasının 1:0 hesablı qələbəsi ilə başa çatıb.

Monteneqro millisi növbəti yoxlama matçını iyunun 5-də səfərdə Slovakiya yığmasına qarşı keçirəcək.

Xatırladaq ki, Marko Yankoviç 2022-ci ilin iyul ayından “Qarabağ”ın uğurları üçün çalışır. Təcrübəli futbolçunun klubla müqaviləsinin müddəti 2027-ci il iyunun 30-na qədərdir.

30 yaşlı mərkəz yarımmüdafiəçisi Ağdam klubunda 171 oyun keçirib, 13 qol və 19 məhsuldar ötürmə müəllifi olub.

Yankoviç karyerası ərzində “Partizan”, “Teleoptik”, “Beytar” (Yerusəlim), “Olimpiakos”, OFK, SPAL, “Maribor”, “Hapoel” (Təl-Əviv), “Krotone” kimi klublarda da çıxış edib.

Marko 2016-cı ilin may ayında debüt etdiyi Monteneqro yığmasında 60 oyuna çıxıb, 1 qol və 8 məhsuldar ötürmə müəllifi olub.