ain.az, Qol.az saytına istinadən bildirir.
Karrik "qırmızı-şeytanlar"ı Çempionlar Liqasına qaytardı!
"Mançester Yunayted" 3 illik fasilədən sonra yenidən UEFA Çempionlar Liqasında yarışacaq.
QOL.az-ın xəbərinə görə, "qırmızı-şeytanlar" dünən 35-ci turda "Liverpul"a qalib gəlib (3:2) və son 3 turun nəticəsindən asılı olmayaraq, Premyer Liqada ilk beşlikdə yerini təmin edib.
Hazırda onlar 35 oyundan 64 xalla 3-cü yeri tuturlar. 6-cı yerdəki "Bornmut"la "Mançester Yunayted" arasında xal fərqi isə 12-ə çatıb. Beləliklə, son 3 turun nəticəsindən asılı olmayaraq mançesterlilər 5-ci yeri tərk etməyəcəklər.
Qeyd edək ki, "Mançester Yunayted" 2026-cı ilin qışında komandaya baş məşqçi təyin edilən Maykl Karrikin rəhbərliyi altında uğurlu mövsüm keçirib. 44 yaşlı mütəxəssisin rəhbərliyi altında "MY" ÇL-ə vəsiqə qazanmaqla yanaşı "Liverpul", "Mançester Siti", "Arsenal", "Çelsi", "Aston Villa" kimi komandalara qalib gəlməyi bacarıb.
Xatırladaq ki, "qırmızı-şeytanlar" son dəfə Çempionlar Liqasında 2023/2024 mövsümündə iştirak ediblər. Həmin vaxt komanda "Bavariya", "Kopenhagen" və "Qalatasaray" ilə eyni qrupda yarışıb və sonuncu yeri tutub.
Sonrakı hadisələr barədə daha çox məlumat almaq üçün ain.az saytını izləyin.
