İtaliyanın Baş naziri Corcia Meloni yaxın həftələrdə Azərbaycana səfər edəcək.
Bizim.Media xəbər verir ki, səfərin may-iyun aylarında baş tutacağı gözlənilir. Euronews-un məlumatına görə, bu səfər Roma ilə Bakı arasında davam edən siyasi və iqtisadi əməkdaşlığın tərkib hissəsidir.
Bildirilir ki, energetika İtaliya-Azərbaycan münasibətlərində əsas istiqamətlərdən biri hesab olunur. Azərbaycan Xəzər regionunu Avropa ilə birləşdirən daha geniş Cənub Qaz Dəhlizinin bir hissəsi olan Trans-Adriatik Boru Kəməri (TAP) vasitəsilə İtaliyaya təbii qaz ixrac edir.
TAP-ın idarəedici direktoru Luka Şippati Euronews-a açıqlamasında bildirib ki, kommersiya istismarına başlanılandan indiyədək bu boru kəməri ilə İtaliyaya 47,5 milyard kubmetrdən çox təbii qaz nəql olunub.
Onun sözlərinə görə, İtaliyanın SNAM SpA şirkətinin məlumatına əsasən, 2025-ci ildə TAP vasitəsilə nəql edilən qaz ölkənin ümumi qaz tələbatının təxminən 16 faizini ödəyib.
Şippati qeyd edib ki, ümumilikdə Avropaya TAP vasitəsilə 57 milyard kubmetrdən çox qaz çatdırılıb. Bu isə tədarük marşrutlarının şaxələndirilməsinə və Avropanın qaz sisteminin dayanıqlığının artırılmasına töhfə verir.
O vurğulayıb ki, İtaliya Azərbaycan qazının TAP vasitəsilə əsas ixrac istiqaməti olmaqla yanaşı, Avropa bazarına boru kəməri tədarükü üçün mühüm giriş nöqtəsidir.
Əməliyyat göstəricilərinə görə, 2025-ci ildə TAP İtaliyanın ümumi qaz idxalının təxminən 16,5 faizini, mayeləşdirilmiş təbii qaz (LNG) nəzərə alınmadan isə boru kəməri ilə qaz idxalının təxminən 25 faizini təmin edib.
Yunanıstandakı kompressor stansiyasında aparılan son modernizasiya işləri kəmərin uzunmüddətli ötürücülük qabiliyyətini ildə 1,2 milyard kubmetr artırıb və bununla da nəql imkanlarını genişləndirib.
İllər üzrə tədarük göstəriciləri də sabit dinamikanı nümayiş etdirir: 2021-ci ildə 6,83 milyard kubmetr, 2022-ci ildə 9,69 milyard kubmetr, 2023-cü ildə 9,37 milyard kubmetr, 2024-cü ildə 9,76 milyard kubmetr, 2025-ci ildə isə 9,46 milyard kubmetr qaz nəql olunub. Cari ilin əvvəlindən indiyədək isə 2,4 milyard kubmetrdən çox qaz tədarük edilib.
Şippati əlavə edib ki, etibarlılıq sistemin fəaliyyətində əsas prinsip olaraq qalır və kommersiya istismarına başlanandan bu günədək infrastrukturun 100 faiz əlçatanlığı təmin olunub.
Onun sözlərinə görə, TAP kommersiya əsaslı fəaliyyət göstərsə də, İtaliya ilə Azərbaycan arasında yüksək səviyyəli ikitərəfli təmaslar enerji sahəsində uzunmüddətli əməkdaşlığı və Cənub Qaz Dəhlizinin strateji əhəmiyyətini bir daha təsdiqləyir.
Bizim.Media
