ABŞ-ın dövlət katibi Marko Rubio Livan prezidenti Cozef Aun və İsrail Baş naziri Benyamin Netanyahu arasında videoəlaqə vasitəsilə baş tutacaq ilk təmasda vasitəçi qismində çıxış edəcək.
AFN.az xəbər verir ki, bu barədə "Al Jadeed" telekanalı diplomatik mənbəyə istinadən məlumat yayıb.
Mənbənin bildirdiyinə görə, bu, üçtərəfli danışıqlar formatında olacaq: "Dövlət katibi Rubio bu danışıqlarda iştirak edəcək, çünki o, Livan-İsrail istiqaməti üzrə kuratordur".
Xatırladaq ki, çərşənbə günü ABŞ Prezidenti Donald Tramp Netanyahu və Aun arasında danışıqların cümə axşamı günü keçiriləcəyini bəyan etmişdi. Onun sözlərinə görə, bu, İsrail və Livan liderləri arasında son 34 ildə baş tutan ilk birbaşa söhbət olacaq.
Diplomatik çevrələrdə bu addım Yaxın Şərqdə gərginliyin azaldılması və tərəflər arasında illərdir davam edən rəsmi sükutun pozulması istiqamətində tarixi dönüş nöqtəsi kimi qiymətləndirilir. Danışıqların əsas mövzusunun atəşkəs şərtləri və regionun təhlükəsizlik arxitekturası olacağı gözlənilir.
