ain.az, Banco.az saytından verilən məlumata əsaslanaraq xəbər yayır.
Müəllif:Mehin Qasımova,Banco.az
ABŞ-ın "S&P 500" indeksi ABŞ–İran müharibəsinin başlanmasından sonra ilk dəfə rekord həddə yüksəlib.
Banco.az xəbər verir ki, çərşənbə günü bağlanışda indeks 0,8% artaraq 7022,95 bəndə çatıb və bununla da yanvar ayında qeydə alınmış əvvəlki rekord göstəricini geridə qoyub. Gün ərzində isə indeks 7026,24 bənd səviyyəsinə qədər yüksələrək yeni zirvə müəyyən edib.
Bazarların yüksəlişi münaqişənin səngiyə biləcəyi ilə bağlı gözləntilər və güclü korporativ mənfəət proqnozları ilə əlaqələndirilir. Bu amillər investorların yenidən riskli aktivlərə yönəlməsinə səbəb olub.
ABŞ prezidenti Donald Trump İslamabadda keçirilən ilkin görüşün nəticəsiz başa çatmasından sonra İranla müharibənin dayandırılması üçün danışıqların tezliklə bərpa oluna biləcəyini bildirib.
Xatırladaq ki, fevralın 28-də müharibənin başlaması ilə fond bazarlarında kəskin enişlər müşahidə olunmuş, neft bazarlarında isə ciddi şok yaşanmışdı. Bu proses inflyasiya və faiz dərəcələri ilə bağlı qeyri-müəyyənliyi daha da artırmışdı.
Analitiklər "S&P 500" şirkətlərinin 2026-cı ilin birinci rübündə ümumilikdə 605,1 milyard dollar mənfəət əldə edəcəyini proqnozlaşdırırlar. Bu göstərici rübün əvvəlində gözlənilən 598,7 milyard dollardan daha yüksəkdir.
Böyük bankların rəhbərləri bildirirlər ki, neft bazarındakı dalğalanmalara baxmayaraq, ABŞ-da istehlakçı aktivliyi davam edir, həmçinin birləşmə və satınalmalar (M&A) ilə ilkin kütləvi təkliflərə (IPO) maraq yüksək olaraq qalır.
Bir sıra broker şirkətləri müharibə fonunda yaranan bazar enişlərini alış imkanı kimi qiymətləndirib. Bununla belə, münaqişənin yenidən alovlanması ehtimalı investorlar üçün əsas risk faktorlarından biri olaraq qalır.
Ekspertlər hesab edirlər ki, geosiyasi risklər azalsa belə, müharibədən əvvəl bazar əhval-ruhiyyəsinə təsir edən amillər yenidən gündəmə gələ bilər.
Sonrakı hadisələr barədə daha çox məlumat almaq üçün ain.az saytını izləyin.
