Rusiya "kosmik Pörl-Harbor" əməliyyatı çərçivəsində orbitdə nüvə silahı yerləşdirmək niyyətindədir.
Musavat.com xəbər verir ki, bu barədə ABŞ Kosmik Komandanlığının rəhbəri general Stiven Uaytinq "The Times" nəşrinə müsahibəsində xəbərdarlıq edib.
Generalın sözlərinə görə, ABŞ Kremlin bu planlarından ciddi şəkildə narahatdır.
Rusiya orbitdə peyk əleyhinə nüvə silahı yerləşdirmək imkanlarını nəzərdən keçirir ki, bu da yerətrafı aşağı orbitdə olan bütün peykləri təhlükə altına qoyur.
Yerətrafı aşağı orbitdə (Yerdən 300-1200 mil hündürlükdə) baş verəcək nüvə partlayışı 10000-ə qədər peyki (ümumi sayın təxminən 80%-i) məhv edə və ya sıradan çıxara bilər. Bu ssenari hərbi kəşfiyyat və hədəf müəyyənləşdirmə sistemləri ilə yanaşı, mülki rabitə, internet, mobil telefon və GPS sistemlərinin də tamamilə çökməsinə səbəb olacaq. Analitiklər bu potensial təhlükəni artıq "kosmik Pörl-Harbor" adlandırıblar.
Uaytinq həmçinin vurğulayıb ki, Rusiya hazırda peyk rabitəsi və GPS sistemlərinə qarşı genişmiqyaslı "maneə törətmə" (siqnalların boğulması) fəaliyyəti yürüdür. Bu isə Şərqi və Cənubi Avropada mülki təyyarələrin uçuş təhlükəsizliyini riskə atır. General eyni zamanda Çini kosmosda ABŞ-ın ən böyük rəqibi adlandıraraq, Pekinin bu sahədə "qorxunc dərəcədə sürətlə" irəlilədiyini qeyd edib.
Musavat.com
