Nayrobi hava limanında 2 mindən çox qarışqanın Keniydan qanunsuz çıxarılmasının qarşısı alınıb. Lakin bu cəhd qlobal vəhşi təbiət qaçaqmalçılığı şəbəkələri çərçivəsində onurğasızların ticarətinin genişləndiyini təsdiqləyib.
AZƏRTAC “Daily Nation” nəşrinə istinadla xəbər verir ki, Keniya xidmət orqanlarının məlumatına görə, bu cür hallar Avropa və Asiyada onurğasızlara davamlı tələbatın olduğunu əks etdirir. Həmin canlılardan ekzotik ev heyvanları kimi də istifadə olunur.
Bundan əvvəl də oxşar hüquq pozuntuları baş verib və bu hadisə də həmin insidentlərin davamı kimi qiymətləndirilir. Belə ki, ötən il Keniyada 5 mindən çox qarışqanın ölkədən çıxarılmasına cəhd işi üzrə təqsirləndirilən şəxslər məhkum olunublar. Bununla yanaşı, ekspertlər qeyd edirlər ki, vəhşi təbiətin qeyri-qanuni ticarəti bazarı uzun müddətdir ki, yalnız iri heyvanları deyil, həm də həşəratlardan hörümçəkkimilərədək geniş onurğasızlar növlərini əhatə edir.
Qaçaqmalçılıq üsulları qeyri-qanuni ticarətin digər seqmentləri ilə üst-üstə düşür, yəni həşərat növləri daşınan digər məhsullar arasında gizlədilir, qismən itkilər nəzərə alınmaqla konteynerlərdə və ya iri partiyalarla daşınır. Məsələni daha da çətinləşdirən odur ki, bəzi növlərin qanuni satışı da mövcuddur. Bu isə qanuni və qanunsuz malların bir-birinə qarışmasına səbəb olur.
Beynəlxalq tənzimləmə, o cümlədən “CITES” normaları bütün növləri əhatə etmir. Xüsusilə həşəratlarla bağlı qaydalar hərtərəfli deyil. Bu da nəzarəti zəiflədir və qeyri-qanuni bazarın genişlənməsinə şərait yaradır.
Beləliklə, Nayrobi hadisəsi göstərir ki, vəhşi təbiətin qeyri-qanuni ticarəti genişlənir. Əvvəllər diqqətdən kənarda qalan kiçik canlılar isə bu ticarətdə getdikcə daha böyük rol oynamağa başlayır.
