Qazaxıstan və Azərbaycan kiberhücumların araşdırılmasında fəal şəkildə təcrübə mübadiləsi aparır və bir-birinə qarşılıqlı yardım göstərir.
AZƏRTAC xəbər verir ki, TSARKA qrupu (Kiberhücumların Təhlili və Təhqiqatı Mərkəzi) baş direktorunun müavini Ruslan Turquldinov bunu Astanada keçirilən “Qazaxıstanın kibermaliyyə qalxanı: fırıldaqçılıq miflərinin ifşa edilməsi” forumu çərçivəsində jurnalistlərə açıqlamasında bildirib.
Onun sözlərinə görə, Azərbaycanın infrastrukturuna təsir edən kibertəhlükəsizlik hadisələri baş verdikdə, Qazaxıstan birbaşa dost ölkədəki səlahiyyətli orqanla əlaqə saxlayır və dərhal kömək göstərir.
Eynilə, Azərbaycan kiberhücumların mənbələrinin müəyyənləşdirilməsinə kömək məqsədilə TSARKA ilə əlaqə saxlayır.
Turquldinov, həmçinin bildirib ki, Türk Dövlətləri Təşkilatı (TDT) daxilində Kibertəhlükəsizlik Şurasının yaradılması istiqamətində də tədbirlər görülür.
