Müəllif:Mehin Qasımova,Banco.az
"WhatsApp" son illərin ən böyük yeniliklərindən birinə hazırlaşır. Platformanın bir müddətdir mövcud olan və əsasən birtərəfli məlumat yayımı üçün istifadə edilən Kanallar funksiyası artıq yeni mərhələyə keçir. Bu bölmə kontent yaradıcıları üçün gəlir mənbəyinə çevrilə bilər.
Banco.az xəbər verir ki, tətbiqin Android üçün yayımlanan son beta versiyalarında Premium abunə modelinin sınaqdan keçirildiyi məlum olub. Yeniliyə əsasən, kanal sahibləri öz məzmunlarını ödənişli divar arxasında təqdim edə biləcəklər. Bu isə istifadəçilərin müəyyən paylaşımlara yalnız abunə olduqdan sonra çıxış əldə etməsi deməkdir.
Yeni model çərçivəsində kontent yaradıcıları abunəçilərinə eksklüziv materiallar təqdim edə biləcəklər. Bunlara şəxsi mesajlar və təhlillər, yüksək keyfiyyətli foto və video paylaşımları, eləcə də yalnız ödəniş edən istifadəçilər üçün nəzərdə tutulan xüsusi elanlar daxildir.
Məlumata görə, "Meta Platforms" bu abunəliklərdən təxminən 10% komissiya götürməyi planlaşdırır. Bununla belə, tətbiqin əsas funksiyası – şəxsi mesajlaşma xidməti istifadəçilər üçün pulsuz olaraq qalacaq. Ödənişli model yalnız Kanallar bölməsində könüllü abunəlikləri əhatə edəcək.
Qeyd edək ki, "Meta Platforms" daha əvvəl "Instagram" platformasında oxşar abunə sistemini tətbiq etmişdi. İndi isə bu yanaşma birbaşa WhatsApp-a inteqrasiya olunur. Şirkətin əsas məqsədi platformada kontent yaradıcılarını saxlamaq və yeni monetizasiya imkanları yaratmaqdır.
Ekspertlər hesab edir ki, bu addım WhatsApp-ın sadəcə mesajlaşma tətbiqi olmaqdan çıxaraq "Telegram" və digər platformalar kimi məzmun istehlakı və yaradılması mərkəzinə çevrildiyini göstərir.
