ain.az, Azpolitika.az portalına istinadən məlumat yayır.
ABŞ-nin İrana qarşı apardığı hərbi əməliyyatlar zamanı itkilərinin miqyası genişlənməkdədir. CNN telekanalının hesablamalarına görə, rəsmi Vaşinqton müharibə müddətində azı 7 pilotlu hərbi təyyarəsini itirib.
Məlumata görə, son itkilər arasında F-15E Strike Eagle qırıcı-bombardmançısı da var. Təyyarə aprelin 3-də İranın hava hücumundan müdafiə sistemləri tərəfindən vurulub. Həmin insident zamanı digər ABŞ təyyarəsi – A-10 Thunderbolt II hücum təyyarəsi də zərər görüb. Belə ki, o, vurulan F-15-in ekipaj üzvünü xilas etmək əməliyyatı zamanı zədələnərək alovlanıb.
CNN-in yazdığına görə, martın 2-də isə üç ədəd F-15 qırıcısı “dost atəşi” nəticəsində, yəni Küveytin hava hücumundan müdafiə sistemləri tərəfindən səhvən vurulub. Martın 12-də İraqda ABŞ-yə məxsus KC-135 yanacaqdaşıyan təyyarə qəzaya uğrayıb və nəticədə 6 ekipaj üzvü həlak olub.
Martın 27-də isə daha bir ciddi itki qeydə alınıb – ABŞ-nin uzaqdan radiolokasiya müşahidə təyyarəsi E-3 Sentry, Səudiyyə Ərəbistanındakı aviabazaya İran tərəfindən edilən hücum zamanı məhv edilib.
Bundan əlavə, CNN-ə danışan mənbələrin bildirdiyinə görə, mart ayında ABŞ-yə məxsus ən müasir qırıcılardan biri olan F-35 də Yaxın Şərqdə yerləşən aviabazalardan birinə məcburi eniş edib. İlkin ehtimallara görə, təyyarə İran qüvvələri tərəfindən atəşə tutulub.
Eyni zamanda, ABŞ hərbçilərinin vurulan F-15 qırıcısının ikinci ekipaj üzvünü də xilas etdiyi bildirilir. CBS News-un məlumatına əsasən, xilasetmə əməliyyatı zamanı ABŞ qüvvələri iki nəqliyyat təyyarəsini məhv edib ki, onların İran qüvvələrinin əlinə keçməsinin qarşısı alınsın.
Baş verənlər göstərir ki, ABŞ-nin texnoloji üstünlüyünə baxmayaraq, İranın hava hücumundan müdafiə sistemləri və cavab zərbələri ciddi nəticələr doğurmağa başlayıb. Bu isə münaqişənin daha da genişlənməsi və itkilərin artması ehtimalını gücləndirir.
“AzPolitika.info”
Hadisənin gedişatını izləmək üçün ain.az saytında ən son yeniliklərə baxın.
