Gəncə Şəhər İcra Hakimiyyətinin başçısı Niyazi Bayramov 2016-cı ildə Aprel döyüşləri zamanı qəhrəmancasına şəhid olan Bayramov Vaqif Dilqəm oğlunun və Quliyev İnqilab Çingiz oğlunun ailə üzvlərini ziyarət edib.
"Unikal" xəbər verir ki, ziyarətdə YAP Gəncə şəhər təşkilatının sədri Bayram Aslanov, bələdiyyə sədrləri, həmçinin Gəncə Şəhər İcra Hakimiyyəti başçısı Aparatının məsul əməkdaşları da iştirak ediblər.
Şəhər rəhbəri bildirib ki, şanlı Zəfərimizin başlanğıcı məhz Aprel döyüşləri ilə qoyulub. O qeyd edib ki, 2016-cı il aprel ayının 1-dən 2-nə keçən gecə tariximizin şərəfli və qürurverici səhifələrindən biri kimi yadda qalıb. Vurğulanıb ki, həmin döyüşlərdə Azərbaycan əsgəri misilsiz şücaət və qəhrəmanlıq nümayiş etdirərək düşmənə sarsıdıcı zərbə endirib, xalqımızın döyüş ruhunu və qələbə əzmini bütün dünyaya göstərib. Şəhidlərimizin canları bahasına qazandıqları bu uğur sonrakı böyük Zəfərin möhkəm təməlini təşkil edib və onların göstərdiyi igidlik hər zaman dərin ehtiramla xatırlanacaq.
Görüşdə hər iki şəhidin keçdiyi şərəfli ömür yoluna nəzər salınıb, onların qəhrəmanlıqlarından bəhs olunub.
Şəhid ailələri öz növbələrində göstərilən diqqət və qayğı üçün Prezident İlham Əliyevə və Birinci vitse-prezident Mehriban xanım Əliyevaya öz dərin təşəkkürlərini bildiriblər.
Xatırladaq ki, Quliyev İnqilab Çingiz oğlu Azərbaycan Respublikası Prezidentinin müvafiq Sərəncamına əsasən “İgidliyə görə” medalı ilə (ölümündən sonra) təltif edilib. Bayramov Vaqif Dilqəm oğlu isə 3-cü dərəcəli “Vətənə xidmətə görə” ordeni ilə (ölümündən sonra) təltif olunub.
