Donald Trump bazar günü axşam bildirib ki, İranla birbaşa danışıqlar davam edir və Tehranla razılaşma yaxın ola bilər.
Marja xəbər verir ki, "Air Force One" təyyarəsinin göyərtəsində jurnalistlərə danışan Tramp bildirib ki, danışıqlar “son dərəcə yaxşı” gedir və ABŞ-ın son bir ayda bir neçə yüksək vəzifəli iranlı rəsmisini öldürdüyü zərbələrdən sonra Tehranda “rejim dəyişikliyi”nin olduğunu iddia edərək İranla razılaşmanın mümkün olduğunu deyib.
“Düşünürəm ki, onlarla razılaşma əldə edəcəyik, amma mümkündür ki, etməyək,” – prezident bildirib. Jurnalistin sualına cavab olaraq Tramp deyib: “İranla razılaşmanı görürəm, bu, tezliklə baş verə bilər,” lakin o, konkret vaxt qrafiki təqdim etməyib.
İran isə fevralın sonlarında müharibənin başlanmasından bəri Vaşinqtonla birbaşa danışıqların keçirildiyini əsasən təkzib edib və hər hansı danışıqların baş tutması üçün əvvəlcə hərbi əməliyyatların dayandırılmasını tələb edib.
Tramp ABŞ-ın İranda quru qoşunları yerləşdirib-yerləşdirməyəcəyi barədə sualı cavablandırmaqdan imtina edib və bildirib ki, Vaşinqton İranla bağlı planlarında “qrafikdən həftələrlə irəlidədir” və Tehranın hava qüvvələrini, donanmasını və raket buraxılış imkanlarını məhv edib.
O iddia edib ki, Tehran ABŞ-a güzəşt kimi təxminən 20 neft tankerinin Hürmüz Boğazından keçməsinə icazə verib. Həftəsonu yayılan məlumatlarda isə İranın Pakistan bayrağı altında üzən 20 gəminin boğazdan keçməsinə icazə verdiyi bildirilirdi.
“Biz (İranla) birbaşa və dolayı yolla danışıqlar aparırıq… onlar bizə 20 neft gəmisini verdilər, böyük, çox böyük neft gəmiləri Hörmüz boğazından keçəcək,” – Tramp jurnalistlərə deyib və əlavə edib ki, bu hərəkət sabah səhər başlayacaq.
Yaxın Şərqdə hərbi qarşıdurmalar həftəsonu da davam edib. Yəməndəki Husi hərəkatının İsrailə hücumu münaqişədə yeni bir cəbhənin yarandığını göstərib. İran və İsrail də qarşılıqlı zərbələr endirməyə davam edib, ABŞ-ın isə Yaxın Şərqə minlərlə hərbçi göndərdiyi müşahidə olunub.
