Türkiyə, Misir, Səudiyyə Ərəbistanı və Pakistanın xarici işlər nazirləri martın 29-da İslamabadda bir araya gəlib. Zirvə görüşünün əsas məqsədi ABŞ və İran arasında yaranmış gərginliyi yumşaltmaq və birbaşa dialoqa şərait yaratmaqdır.
VAXT.AZ “Wall Street Journal”a (WSJ) istinadən xəbər verir ki, Pakistan İslamabaddan vasitəçi rolunu aktiv şəkildə icra edərək, Donald Tramp administrasiyası ilə Tehran arasında mesaj mübadiləsini təmin edib. Pakistanın diplomatları və hərbi rəhbərliyi tərəfindən ötürülən təkliflər arasında ABŞ-ın İran üçün hazırladığı 15 maddəlik plan da yer alıb. İran tərəfi isə bu təklifləri qəbul etməyib və bəzi şərtlərlə cavab verib.
Pakistanın bu diplomatik rolu ölkənin beynəlxalq imicini gücləndirib. İslamabadın ABŞ-dəki sabiq səfiri Hüseyin Hakkani “WSJ”yə açıqlamasında bildirib ki, “Anlaşma olsun ya olmasın, Pakistan bu prosesdə qazan-qazan vəziyyətindədir. Təcrid imici artıq yerini mərkəzi rolun təmin edilməsinə verib”.
Pakistanın yaxın qonşusu İran və Səudiyyə Ərəbistanı ilə dostyana münasibətləri, həmçinin Tramp administrasiyası ilə yenidən qurulmuş əlaqələri ölkəni regionda mühüm vasitəçiyə çevirib. Bu diplomatik addımlar həmçinin regionda hərbi qarşıdurmanın qarşısını almağa xidmət edir.
Omandakı sabiq səfiri İmran Əli isə vurğulayıb ki, Pakistan İran və Səudiyyə Ərəbistanı arasında çox həssas diplomatik balansı qorumaq məcburiyyətindədir. Eyni zamanda, Pakistanın ordusu, xüsusilə baş qərargah rəisi, General Asım Munir ABŞ–Pakistan əlaqələrində strateji rolu ilə diqqət çəkir.
Zirvə görüşünün fonunda İran da öz mövqeyini açıqlayıb. İran Məclisinin sədri Məhəmməd Bəkir Qalibaf bildirib ki, ABŞ sanki müzakirələrdən bəhs etsə də, gizli hərbi planlar qurur. Qalibaf bildirib ki, İran xalqı ölkəsinin maraqlarını qorumaqda qətiyyətlidir.
Hazırda regionda ABŞ-İran münasibətlərinin gərginliyi, İsrailin əməliyyatları və hərbi səfərbərlik tədbirləri Pakistanın vasitəçilik səylərini kritik hala gətirib. Analitiklər hesab edir ki, Pakistanın rolu regionun gələcək siyasi və hərbi balansına təsir edəcək, eyni zamanda ölkənin beynəlxalq nüfuzunu artıracaq.
