Mərc və oyun alqı-satqısı ilə bağlı aparılan istintaq çərçivəsində dekabrın 9-da həbs edilən “Qalatasaray” futbolçusu Metehan Baltacı 105 gün sonra sərbəst buraxılıb.
NOCOMMENT.az-ın məlumatına görə, bu barədə “Hürriyet” qəzeti yazıb.
Bu gün keçirilən məhkəmə iclasında futbolçuya dəstək olmaq üçün bir sıra oyunçular da məhkəməyə gəlib. Eyni zamanda, “Qalatasaray”ın baş məşqçisi Okan Buruk, klubun ikinci prezidenti Metin Öztürk, baş katib Eray Yazqan və vitse-prezident Abdullah Kavukcu da məhkəmə zalında iştirak edərək Metehan Baltacıya dəstək nümayiş etdiriblər.
Xatırladaq ki, prokuror futbolçu üçün 4 il 1 ay 15 gündən 10 il 4 ay 15 günədək həbs cəzası istəyib. Buna baxmayaraq, məhkəmə gənc oyunçunun azadlığa buraxılması barədə qərar qəbul edib. Növbəti məhkəmə iclası iyunun 12-nə təyin olunub. 2028-ci ilə qədər “Qalatasaray”la müqaviləsi qüvvədə olan futbolçunun oyunlardan kənarlaşdırılması ilə bağlı cəza müddəti isə avqustun 7-də başa çatacaq.
NOCOMMENT.az
