İranın parlament komissiyasının üzvü Əlaəddin Borucerdi İslam Respublikasının Hörmüz boğazı üzərində "yeni suveren rejim" tətbiq etdiyini və bəzi xarici gəmilərin keçidi üçün 2 milyon dollar məbləğində rüsum toplamağa başladığını bəyan edib.
Musavat.com xəbər verir ki, "Iran International" nəşrinə danışan iranlı deputat bu addımı müharibə xərclərinin qarşılanması zərurəti ilə əsaslandırıb. Borucerdi vurğulayıb ki, onilliklər boyu davam edən status-kvo dəyişib və indi Hörmüz boğazından keçmək istəyən gəmilər bu "tranzit haqqını" ödəməlidirlər. "Müharibə pul tələb edir və biz təbii olaraq bu vəsaiti boğazdan keçən gəmilərdən almalıyıq. Bu, İranın bölgədəki gücünün və hakimiyyətinin göstəricisidir", – deyə parlamentari bildirib.
"Financial Times"ın araşdırmasına görə, artıq bir neçə tankerin, o cümlədən Hindistan və Pakistana məxsus gəmilərin bu məbləği ödəyərək xüsusi dəhliz vasitəsilə keçid etdiyi ehtimal olunur. Ödənişlərin nağd pul, kriptovalyuta və ya barter yolu ilə qəbul edildiyi bildirilir. Bu "özəl ödənişli zona" rejimi xüsusilə ABŞ və İsrail tərəfindən tətbiq edilən iqtisadi təzyiqlərə qarşı Tehranın cavab reaksiyası kimi qiymətləndirilir. Digər tərəfdən, ABŞ Prezidenti Donald Trampın boğazın 48 saat ərzində tam açılmayacağı təqdirdə İranın enerji infrastrukturunu "yerlə-yeksan edəcəyi" barədə ultimatumuna cavab olaraq, Borucerdi İsrailin enerji şəbəkəsinin cəmi bir gün ərzində məhv edilə biləcəyini xatırladıb. Hazırda dünya sığorta şirkətləri və gəmiçilik operatorları Hörmüz boğazını "yüksək riskli zona" elan ediblər ki, bu da qlobal neft və qaz qiymətlərində kəskin artıma səbəb olub.
Musavat.com
