Böyük Britaniyada ikinci əl satış platforması üçün alınan vintaj bir pencəyin ciblərindən 2004 və 2005-ci illərə aid çox sayda sənəd və şəxsi əşya çıxıb. Tapılanlar arasında artıq fəaliyyətini dayandırmış nəhəng şirkətlərə aid formalar, avtobus biletləri və alış-veriş qəbzləri var.
Moderator.az milli.az-a istinadla xəbər verir ki, "Vinted" platforması vasitəsilə satmaq üçün köhnə bir dəri pencək alan Lüsi Pollard adlı qadın məhsulun ciblərində unudulmuş, 20 ildən çox tarixi olan şəxsi əşyalar aşkar edib. "TikTok"da paylaşılan görüntülərdən məlum olub ki, pencək sonuncu dəfə 2004-cü ilin sonu və 2005-ci ilin əvvəllərində aktiv istifadə edilib.
Pencəyin cibindən çıxan ən diqqətçəkən parça 2013-cü ildə Böyük Britaniyadakı bütün şöbələrini bağlayan məşhur video-icarə şəbəkəsi "Blockbuster"ə aid 2004-cü ilin noyabr tarixli üzvlük forması olub. Formanın üzərində köhnə istifadəçiyə aid ad, ünvan və ev telefonu nömrəsi kimi şəxsi məlumatlar yer alıb.
Ciblərdən həmçinin bank çıxarışı və bir istirahət mərkəzinin reklam broşürü kimi sənədlər də çıxıb. Pollard bank çıxarışı kimi həssas məlumatları məhv edəcəyini bildirib.
Sosial mediada gündəm olan paylaşımın altına gələn şərhlərdə istifadəçilər xüsusilə pişik qumu və nəqliyyat qiymətlərindəki böyük fərqlərə diqqət çəkiblər. Bəzi istifadəçilər isə 20 il əvvələ aid əşyaların artıq "retro" və ya "antik" adlandırılmasının zamanın nə qədər sürətlə keçdiyinin sübutu olduğunu qeyd ediblər.
