Ohayo ştatı üzərində atmosferə daxil olan kosmik obyekt güclü səs dalğası yaradıb...
ABŞ-nin Ohayo ştatı üzərində təxminən yeddi ton ağırlığında böyük meteorit Yer atmosferinə daxil olub və havada parçalanaraq güclü partlayışa bənzər səs yaradıb.
Poliqon xəbər verir ki, bu barədə AP News Agentliyi məlumat yayıb.
Məlumata görə, kosmik obyekt saatda təxminən 72 min kilometr sürətlə hərəkət edib. Meteorit ilk dəfə Eri gölü üzərində təxminən 80 kilometr yüksəklikdə müşahidə olunub. Təxminən 1,8 metr diametrə malik olan obyekt atmosferin yuxarı qatlarında 55 kilometr məsafə qət etdikdən sonra Ohayonun şimal hissəsi üzərində parçalanıb.
Hadisə zamanı yaranan parlaq alov topu bir neçə ştatda, o cümlədən Viskonsin və Merilend ştatlarında yaşayan insanlar tərəfindən müşahidə edilib. Amerika Meteor Cəmiyyətinin məlumatına görə, meteorit səhər saat 9 radələrində səma boyunca hərəkət edib və nadir hallarda olduğu kimi adi gözlə aydın görünüb.
Kosmik obyektin parçalanması zamanı təxminən 250 ton trotil ekvivalentində enerji ayrılıb. Bu səbəbdən region sakinləri güclü səs eşidib, bəzi yerlərdə isə vibrasiya hiss olunub. ABŞ-nin Milli Meteorologiya Xidməti də zərbə dalğasının qeydə alındığını təsdiqləyib.
Hazırda meteoritin qalıqlarının tapılması ilə bağlı rəsmi məlumat verilməsə də, mütəxəssislər kiçik fraqmentlərin Yer səthinə düşmüş ola biləcəyini istisna etmirlər. Alimlər belə hadisələrin öyrənilməsinin Yerə yaxın kosmik obyektlərin davranışını daha yaxşı anlamağa kömək etdiyini bildirirlər.
Poliqon.info
