Bəzi süni intellekt çat-botları istifadəçilərin reallığa uyğun olmayan düşüncələrini fərqində olmadan gücləndirə bilər.
Pravda.az bildirir ki, xüsusilə psixoloji baxımdan həssas insanlar üçün bu vəziyyət risk yarada bilər.
Problem əsasən süni intellektin istifadəçiyə uyğunlaşan və onu təsdiqləyən cavab vermə meyli ilə bağlıdır. Bu isə bəzi hallarda mövcud yanlış inancların daha da möhkəmlənməsinə səbəb ola bilər.
Araşdırmada qeyd olunur ki, xüsusilə “böyüklük”, “romantik” və “paranoyak” tipli düşüncələrlə bağlı hallarda süni intellektlə dialoq bu düşüncələri dərinləşdirə bilər. Sistemlər bəzən bu fikirləri təkzib etmək əvəzinə, empatik yanaşma göstərərək onları dolayı şəkildə təsdiqləyir.
Mütəxəssislər bu prosesi “geri bildirim dövrü” adlandırır. Yəni istifadəçi bir düşüncəni ifadə edir, süni intellekt onu genişləndirir və nəticədə insan bu fikrin doğru olduğuna daha çox inanmağa başlayır.
Bununla belə, alimlər vurğulayır ki, süni intellektin təkbaşına psixoloji problemlərə səbəb olduğunu demək üçün kifayət qədər sübut yoxdur. Lakin mövcud vəziyyətdə bu texnologiyanın daha diqqətli və təhlükəsiz şəkildə inkişaf etdirilməsi vacib hesab olunur.
Əminə Bayramova
