İraq Xarici İşlər Nazirliyi ABŞ-ın Bağdaddakı səfirliyinin müvəqqəti işlər vəkili Coşua Harrisi ABŞ hücumları və İraqdakı təhlükəsizliklə bağlı inkişafları müzakirə etmək üçün nazirliyə çağırıb.İraq Xarici İşlər Nazirliyinin yazılı açıqlamasına görə, İraq Xarici İşlər Nazirliyinin ikitərəfli əlaqələr üzrə müşaviri səfir Məhəmməd Hüseyn Bəhr əl-Ulum ABŞ-ın Bağdaddakı səfirliyinin müvəqqəti işlər vəkili Coşua Harris ilə görüşüb.

Nazirlik binasında keçirilən görüşdə son hərbi və təhlükəsizlik hadisələri və onların İraqa və regiona təsiri müzakirə olunub.Bəhr əl-Ulum görüşdə müharibənin davam etməsinin İraqın təhlükəsizliyinə, suverenliyinə və vətəndaşlarının təhlükəsizliyinə, eləcə də mülki və hərbi obyektlərinə təhdid yaratdığını bildirdi.

O, davam edən münaqişə səbəbindən İraqın ölkənin müxtəlif bölgələrində birbaşa hücumlara məruz qaldığını və ən son olaraq Bağdad, Kərkük, Ənbar və Babildəki hərbi hədəflərə edilən hücumların (ABŞ hücumları) 14 nəfərin ölümünə və 24 nəfərin yaralanmasına səbəb olduğunu qeyd etdi.

Bəhr əl-Ulum İraq hökumətinin bu hücumları öz suverenliyinin açıq şəkildə pozulması hesab etdiyini və onları ən sərt şəkildə pislədiyini vurğuladı.

İraq hökumətinin ölkədəki diplomatik nümayəndəliklərin və personalın təhlükəsizliyini təmin etmək öhdəliyini bir daha təkrarlayan Bəhr əl-Ulum diplomatik nümayəndəliklərə edilən hücumların pislənildiyini və günahkarların məsuliyyətə cəlb edilməsi üçün səylərin davam etdirildiyini bildirdi.

ABŞ-ın Bağdaddakı müvəqqəti işlər vəkili Harris Vaşinqtonun İraqla strateji tərəfdaşlığına sadiq qaldığını və bu əməkdaşlığın, xüsusən də hərbi potensialın gücləndirilməsi, silahlanma, texniki və logistika dəstəyi sahələrində gücləndirilməyə davam edəcəyini bildirdi.

Harris həmçinin ABŞ-ın İranla müharibə vəziyyətində olduğunu və Amerikanın regiondakı siyasətinin ABŞ maraqlarına qarşı təhdidlərə məhdud və müdafiə xarakterli şəkildə cavab vermək olduğunu bildirib.

ABŞ hərbi təyyarələri tərəfindən İraqdakı Haşd əl-Şəabi mövqelərinə qarşı çoxsaylı hava hücumları həyata keçirilib, nəticədə onlarla insan həlak olub və yaralanıb.

aia.az
Tərcümə şöbəsi

• Bağdad
• Müvəqqəti Işlər Vəkili
• İraq
• Xarici İşlər Nazirliyi