“Türkiyədə vurulan raketlər üçüncü tərəfdən atılıb”.
Missiya.Az xəbər verir ki, bunu İranın Ankaradakı səfiri Məhəmməd Həsən Həbibullazadə deyib.
Diplomat ölkəsinin hava məkanında vurulan raketlərlə bağlı hadisələrdə iştirak etmədiyini və birgə işçi qrupu tərəfindən araşdırmanın aparılmasını gözlədiyini bildirib.
"Biz Türkiyənin milli suverenliyinə hörmətlə yanaşırıq. Bu baxımdan, silahlı qüvvələrimiz, Baş Qərargahımız və Xarici İşlər Nazirliyimiz əvvəllər Türkiyəyə hər hansı bir raket və ya sursat hücumunu inkar edən bir bəyanat yayıb. Bu vəziyyəti və fikir ayrılıqlarını daha ətraflı araşdırmaq üçün texniki qrupun yaradılmasını təklif etdik, çünki bunun necə baş verdiyinə dair də qeyri-müəyyənliklərimiz var", - deyə siyasətçi vurğulayıb.
Həbibullazadə bildirib ki, bu hərəkətlər üçüncü tərəflər tərəfindən həyata keçirilə bilər və bu üçüncü tərəflərin səyləri ölkələrimiz arasındakı dostluq və qardaşlıq münasibətlərinə zərər verməyə yönəlib.
Səfir bölgədəki hərbi vəziyyətlə bağlı şərhində İranın heç kimə hücum etmədiyini qeyd edib:
"Onlar bizə hücum etdilər. Biz səmimi və dürüst danışıqlar apararkən, onlar bizə hücum etdilər. ABŞ diplomatiyaya xəyanət etdi. Hücumlar nüvə danışıqları texniki mərhələyə çatanda başladı. Bu danışıqlar əsasən Türkiyə, regional ölkələr tərəfindən tövsiyə edildi və biz də bu tövsiyələrə uyğun olaraq orada iştirak etdik", - deyə siyasətçi əlavə edib.
Onun sözlərinə görə, İslam Respublikası özünü hüquqi cəhətdən müdafiə edib:
"Biz ölkəmizi müdafiə edirik. Hətta indi, sizinlə danışarkən belə, ölkəm hücum altındadır. Xəstəxanalar, infrastruktur və banklar hədəfə alınır və bir çox mülki şəxs həyatını itirir və şəhid olur", - deyə səfir bəyan edib.
Xatırladaq ki, bu gün Türkiyə Milli Müdafiə Nazirliyi NATO qüvvələrinin 4 martdan bəri İrandan atılan üçüncü ballistik raketin məhv edildiyini açıqlayıb.
Daşqın HəsənovMissiya.Az
