Macarıstan XİN rəhbəri bildirib ki, Budapeştin enerji təhlükəsizliyi bu kəmərdən asılıdır və ona qarşı hücum ölkənin milli maraqlarına qarşı yönəlmiş addım sayılır...
Macarıstanın xarici işlər və ticarət naziri Peter Siyyarto Ukraynanın “Türk axını” qaz kəmərinə hücumunu ölkəsinin suverenliyinə qarşı ciddi təhdid kimi qiymətləndirib.
Poliqon xəbər verir ki, bu barədə məlumatı MTI Agentliyi yayıb.
Nazirin sözlərinə görə, Kiyevin bu enerji infrastrukturu obyektinə qarşı hücumu Macarıstanın enerji təminatına birbaşa təsir göstərə bilər. Siyyarto bildirib ki, Budapeşt “Türk axını” qaz kəməri vasitəsilə təbii qazla stabil şəkildə təmin olunur və bu marşrut ölkənin enerji təhlükəsizliyində mühüm rol oynayır.
Diplomat qeyd edib ki, o, qaz kəmərinə hücum barədə məlumatı Rusiya Federasiyasının energetika nazirinin müavinlərindən birindən alıb. Onun sözlərinə görə, əgər “Türk axını” kəməri fəaliyyətini dayandırarsa, Macarıstanın təbii qazla etibarlı şəkildə təmin edilməsi ciddi şəkildə çətinləşə bilər.
Siyyarto vurğulayıb ki, Ukraynanın həyata keçirdiyi addımlar yalnız enerji infrastrukturu məsələsi deyil, həm də siyasi və strateji təhlükəsizlik problemi kimi qiymətləndirilməlidir. Nazir hesab edir ki, Ukraynanın tətbiq etdiyi enerji blokadası və qaz kəmərinə hücum Macarıstanın milli maraqlarına ziddir.
“Beləliklə, Ukraynanın neft blokadası və ‘Türk axını’ qaz kəmərinə hücumu Macarıstanın suverenliyinə qarşı çox kobud və çox ciddi hücumdur”, deyə Siyarto bildirib.
Macarıstan tərəfi hesab edir ki, enerji infrastrukturu obyektlərinə qarşı hücumlar regionun enerji təhlükəsizliyini risk altına qoyur və Avropanın enerji bazarında əlavə gərginlik yarada bilər. Budapeşt bu məsələdə enerji təchizatının sabitliyinin qorunmasının vacibliyini xüsusi vurğulayır.
Analitiklərin fikrincə, Avropa enerji marşrutları ətrafında yaranan gərginlik Ukrayna müharibəsi fonunda daha da artıb və enerji infrastrukturu obyektləri strateji əhəmiyyətli hədəflərə çevrilib.
Poliqon.info
