Rusiya Prezidentinin mətbuat katibi Dmitri Peskov martın 11-də TASS agentliyinə verdiyi açıqlamada Ukrayna münaqişəsinin həlli üçün 2022-ci ildə hazırlanan "İstanbul sənədləri"nin artıq hüquqi və siyasi qüvvəsini itirdiyini bildirib.
Musavat.com xəbər verir ki, Kremlin sözçüsü Moskvanın hələ də həmin razılaşmalara sadiq qalıb-qalmaması barədə suala cavab verərkən, "reallıq tamamilə dəyişib" deyərək vəziyyətin kökündən fərqli olduğunu vurğulayıb. Peskov qeyd edib ki, 2022-ci ilin martında tərəflər tərəfindən paraflanan və Ukraynanın neytral, blokdankənar statusunu nəzərdə tutan layihə o zaman Kiyev və onun Qərb müttəfiqləri tərəfindən pozulub.
Lakin 2026-cı ilin yeni geosiyasi şərtləri, xüsusilə Rusiya, Ukrayna və ABŞ nümayəndələrinin cari ilin fevralında Cenevrədə keçirilən ağır, lakin işgüzar danışıqları fonunda Moskva köhnə şərtlərin artıq işləməyəcəyini bəyan edir.
Diplomatik mənbələr bildirir ki, Rusiya artıq danışıqlarda "yerdəki reallıqları" (yəni yeni ərazilərin statusunu) və 2025-ci ildən bəri dəyişən cəbhə xəttini əsas götürür. Donald Trampın vasitəçiliyi ilə bərpa olunan üçtərəfli danışıqlar formatı hazırda 2022-ci ilin layihəsindən fərqli, daha mürəkkəb və yeni şərtlər toplusu üzərində qurulur.
Peskovun bu bəyanatı Moskvanın yaxın günlərdə keçirilməsi gözlənilən növbəti danışıqlar raundu öncəsi öz mövqeyini sərtləşdirməsi kimi qiymətləndirilir.
Musavat.com
