Gürcüstanda apteklərin sayı Avropa orta göstəricisindən üç dəfə çoxdur ki, bu da dərmanların qiymətini artırır.
Ölkə.Az-ın Gürcüstan mediasına istinadən verdiyi məlumata görə, bu fikri Dərmanlara Nəzarət Agentliyinin keçmiş rəhbəri Tinatin Turdziladze bildirib.
Onun sözlərinə görə, istehlakçı ölkədə yaradılan artıq infrastrukturun saxlanılması xərclərini mahiyyət etibarilə ödəyir.
“Gürcüstanda hər 100.000 sakinə düşən apteklərin sayı Avropa ölkələrindəkindən təxminən üç dəfə çoxdur: təxminən 28-30, bizdə isə təxminən 70-80 aptek var. Bu, apteklərin istismar xərclərini artırır ki, bu da təbii ki, qiymətlərə təsir göstərir”, - deyə Turdziladze qeyd edib və vurğulayıb ki, Gürcüstanda qiymət rəqabəti yoxdur, "yalnız müştəri axını üçün rəqabət var".
