Hökumət hərbi kampaniya davam etdiyi müddətdə arxa cəbhədə xüsusi rejimin qüvvədə qalacağını açıqlayıb...
İsraildə tətbiq olunan fövqəladə vəziyyət rejimi 12 mart 2026-cı il tarixinədək uzadılıb.
Poliqon xəbər verir ki, bu barədə 1 mart tarixində ölkənin N12 televiziya kanalı məlumat yayıb.
Telekanalın yaydığı xəbərə əsasən, hökumət üzvləri arxa cəbhədə fövqəladə vəziyyət rejiminin daha 12 gün müddətinə, 12 martadək qüvvədə saxlanmasını təsdiqləyiblər. Qərar ölkədə davam edən hərbi əməliyyatlar və təhlükəsizlik riskləri fonunda qəbul edilib.
Məlumatda qeyd olunur ki, əgər hərbi kampaniya göstərilən tarixdən əvvəl başa çatarsa, fövqəladə vəziyyət rejimi vaxtından əvvəl ləğv edilə bilər. Hazırkı rejim çərçivəsində təhlükəsizlik tədbirləri gücləndirilib, mülki müdafiə mexanizmləri aktivləşdirilib və əhaliyə rəsmi qurumların göstərişlərinə ciddi riayət etmək tövsiyə olunub.
Fövqəladə vəziyyət rejimi hökumətə əlavə səlahiyyətlər verir, o cümlədən təhlükəsizlik qüvvələrinin operativ fəaliyyət imkanlarını genişləndirir, ictimai təhlükəsizlik tədbirlərinin sərtləşdirilməsinə və strateji obyektlərin qorunmasının gücləndirilməsinə şərait yaradır.
Qeyd edək ki, regionda artan gərginlik və qarşılıqlı hücumlar fonunda İsrail hakimiyyəti təhlükəsizlik məsələlərinə xüsusi diqqət yetirir və vəziyyəti gündəlik əsasda qiymətləndirir.
Poliqon.info
