ABŞ prezidenti Donald Tramp Ukrayna prezidenti Volodimir Zelenski ilə telefon danışığında bildirib ki, Rusiya-Ukrayna münaqişəsinin bir ay ərzində başa çatmasını görmək istəyir. Bu barədə mənbələrə istinadən “Axios” nəşri yazır.
Nəşrin məlumatına görə, fevralın 25-də Donald Tramp və Volodimir Zelenski 30 dəqiqəlik telefon danışığı aparıblar. Danışıqda ABŞ prezidentinin xüsusi elçisi Stiven Uitkoff və Trampın kürəkəni Cared Kuşner də iştirak edib. “Axios”un həmsöhbəti bildirib ki, danışıqlar dostluq və müsbət atmosferdə keçib.
Söhbət zamanı Ukrayna prezidenti ölkəsinə göstərilən dəstəyə görə Donald Trampa təşəkkür edib. Volodimir Zelenski əlavə edib ki, yalnız Tramp Vladimir Putini hərbi əməliyyatları dayandırmağa inandıra bilər.
“Axios”un məlumatına əsasən, ABŞ və Ukrayna prezidentləri Vladimir Putinin iştirakı ilə mümkün üçtərəfli prezident görüşünü də müzakirə ediblər. Donald Tramp bildirib ki, Rusiya–ABŞ–Ukrayna arasında dördüncü raund üçtərəfli danışıqlar uğurlu keçərsə, belə görüşün təşkili üzərində işləyəcək.
Növbəti üçtərəfli görüşün martın əvvəlində keçirilməsi planlaşdırılır. Rusiya prezidentinin mətbuat katibi Dmitri Peskov isə bildirib ki, prezidentlər yalnız əldə olunmuş razılaşmaları yekunlaşdırmaq üçün görüşməlidirlər.
