ABŞ Konqresinin Senatı keçirilən prosedur səsverməsi zamanı Daxili Təhlükəsizlik Nazirliyinin (DTN) fəaliyyətinin bərpa edilməsi üçün zəruri olan maliyyələşdirmə qanun layihəsini qəbul etməyib.
AFN.az-ın məlumatına görə, C-SPAN telekanalı tərəfindən yayımlanan səsvermədə nazirliyin maliyyə ilinin sonuna (30 sentyabr) qədər maliyyələşdirilməsini nəzərdə tutan layihənin lehinə 50, əleyhinə isə 45 senator səs verib. Lakin prosedur qaydalarına görə sənədin qəbulu üçün ən azı 60 səs lazım olduğundan, DTN-in "şatdaun" vəziyyəti davam edir.
Fevralın 14-dən etibarən maliyyə çatışmazlığı səbəbindən fəaliyyətini qismən dayandıran nazirliyin bu vəziyyəti son aylarda ABŞ-da baş verən üçüncü şatdaun olsa da, bu dəfə məhdudiyyətlər yalnız bir federal quruma şamil edilir. Nazirlik üçün maliyyə yalnız fevralın 13-dək nəzərdə tutulmuşdu.
Böhranın əsas səbəbi İmmiqrasiya və Gömrük Mühafizə Xidmətinin (ICE) büdcəsinə dair fikir ayrılıqlarıdır. Demokratlar Minneapolisdə qeyri-qanuni miqrantlara qarşı əməliyyat zamanı iki ABŞ vətəndaşının güllələnməsindən sonra ICE-nin büdcəsini kəsməyi və işinə ciddi düzəlişlər etməyi tələb edirlər.
Xatırladaq ki, 2025-ci il noyabrın 12-də hökumətin maliyyələşdirilməsi barədə qanunun qəbulu ilə ABŞ tarixindəki ən uzunmüddətli – 43 günlük şatdaun rekorduna son qoyulmuşdu. Lakin partiyalararası fikir ayrılıqları büdcə böhranlarını tətikləməyə davam edir.
