Ruben Rubinyan: “Köçəryanın hakimiyyətə gəlişinin qarşısı alınmalıdır”

Ermənistanın sabiq prezidenti Robert Köçəryanın, eləcə də Samvel Karapetyan və Qaqik Tsarukyanın hakimiyyətə gəlişinin qarşısının alınması vacibdir.

Bizim.Media xəbər verir ki, bu barədə parlamentdə jurnalistlərə vitse-spiker Ruben Rubinyan bildirib.

“Biz hesab edirik ki, Köçəryanın və iki oliqarxın hakimiyyətə gəlməsi mənfi hal olar və bunun qarşısı alınmalıdır. Əgər onlar ədalətli şəkildə seçilərlərsə, bu özlüyündə cinayət deyil”, – deyə Rubinyan qeyd edib.

O bildirib ki, Vardan Qukasyan Köçəryan, Karapetyan və Serj Sarkisyanın qüvvələrinin əməkdaşlığı nəticəsində Gümrü şəhərinin meri seçilib. Bu faktın özü cinayət deyil. Lakin Rubinyanın sözlərinə görə, cəmi altı ay sonra Qukasyan rüşvət almaqda ittiham olunaraq saxlanılıb.

Vitse-spiker hesab edir ki, əgər Köçəryan, Karapetyan və Tsarukyan müxtəlif blokların birləşməsi ilə hakimiyyətə gəlsələr, rüşvət ittihamları üzrə heç kim məsuliyyətə cəlb edilməyəcək.

“Onların hakimiyyəti dövründə də, indi də hüquq-mühafizə sistemi öz işini görməyə imkan tapmayacaq. Bəs bu ssenarinin qarşısını necə almaq olar? İnsanlar Köçəryana səs verməməlidirlər”, – deyə Rubinyan vurğulayıb.

Daha əvvəl Samvel Karapetyan “Güclü Ermənistan” partiyası tərəfindən baş nazir postuna namizəd irəli sürülüb.

İş adamı və “Çiçəklənən Ermənistan” partiyasının lideri Qaqik Tsarukyan isə iyun ayında keçiriləcək parlament seçkilərində “Ermənistan üçün təklif” proqramı ilə iştirak edəcəyini açıqlayıb.

Öz növbəsində sabiq prezident Robert Köçəryan seçkilərdə böyük müxalifət blokunun formalaşdırılması imkanının olduğunu bildirib.

Xatırladaq ki, Ermənistanda parlament seçkiləri 7 iyun tarixində keçiriləcək. (Mənbə: Sputnik Ermənistan)

Bizim.Media