Avropa Parlamenti: Aİ–ABŞ ticarət sazişinin ratifikasiyasını dayandırıb » AzadMedia.az

Avropa Parlamenti Avropa İttifaqı ilə ABŞ arasında ötən ilin iyulunda Şotlandiyada imzalanmış ticarət sazişinin ratifikasiyası prosesini dayandırıb. Sənəd ABŞ Prezidenti Donald Trump ilə razılaşdırılmışdı.

Məlumata görə, Parlamentin Beynəlxalq Ticarət Komitəsində çərşənbə axşamına planlaşdırılan səsvermə Vaşinqtonun tarif siyasəti ətrafında davam edən qeyri-müəyyənlik fonunda təxirə salınıb.

“Yaşıllar/Avropa Azad Alyansı” fraksiyasının ticarət siyasəti üzrə nümayəndəsi Anna Cavazzini bildirib ki, mövcud şəraitdə səsvermənin keçirilməsi “əsassız olardı”.
Onun sözlərinə görə, ABŞ-ın Aİ ixracına tətbiq etdiyi yeni tariflər 15 faizi ötür və bu, əldə olunmuş razılaşmaları pozur.
Cavazzini vurğulayıb ki, Tramp administrasiyası əlavə və “özbaşına” rüsumlar elan etməkdə davam edir və bu səviyyədə etimadsızlıq şəraitində sazişin formal təsdiqi mümkün deyil.
Deputat əlavə edib ki, əsas prioritet hələ də polad, alüminium və əlaqəli məhsullara tətbiq olunan 50 faizlik tariflərin aradan qaldırılmasıdır.

“İndi top ABŞ tərəfinin meydanındadır. Tariflər son dərəcə qeyri-populyardır və Trampın vəd etdiyi sənaye iş yerlərinin yaradılmasına gətirib çıxarmayıb”, – deyə Cavazzini qeyd edib.