Rusiya-Ukrayna müharibəsində dronlardan istifadə hər iki ordunun döyüş taktikasının əsasını təşkil edir. Görünür, dünyanın digər silahlı münaqişələrində də eyni tendensiya güclənir...
Poliqon The New York Times-a istinadən xəbər verir ki, Cənubi Amerikanın Kolumbiya ölkəsində, onilliklərdir aşağı intensivlikli vətəndaş müharibəsinin davam etdiyi şəraitdə üsyançılar hökumət qoşunlarına zərbələr endirmək üçün pilotsuz uçuş aparatlarından istifadə etməyə başlayıblar.
"Əsgərlər snayperlərə və pusqulara öyrəşmişdilər, amma indi onlara rəqiblərinin minlərlə sayda malik olduğu yeni silahla mübarizə aparmaq lazım gəlib: Amazondan həvəskarlar üçün alınan, qarmaqvari tutacaqlarla təchiz edilmiş, üzərinə qumbara bərkidilən kiçik dron sürüləri ilə", deyə NYT yazıb.
Nəşr, xüsusilə, Venesuela sərhədi yaxınlığında yanacaq anbarına partizanların hücumu ilə bağlı epizoddan bəhs edir. Kolumbiya təhlükəsizlik xidmətinin nümayəndələrinin sözlərinə görə, iki həftə ərzində əsgərlər hücumları dəf edərək yarım yüzə yaxın kiçik dronu məhv ediblər. Lakin sonra adətən pestisid səpmək üçün istifadə olunan daha böyük bir pilotsuz aparat uçub gəlib. Əsgərlər onun gəlişini qaçırdıqları üçün aparat dörd qumbara ataraq bir hərbçini öldürüb.
Kolumbiya rəsmilərinin sözlərinə görə, bu, son vaxtlar ölkə üzrə baş vermiş çoxsaylı oxşar hadisələrdən yalnız biridir. Onlar bunu narahatedici tendensiya kimi qiymətləndirirlər: üsyançılar ucuz qiymətə asanlıqla dəyişdirilə bilən dronlar ala bilirlər ki, bu da üsyançı qruplara qarşı uzunmüddətli müharibədə vəziyyəti dəyişir və hökuməti əlverişsiz mövqeyə salır.
2025-ci ildə bir neçə ay ərzində üsyançıların dronları 58 əsgər və polisi öldürüb, daha 300 nəfəri yaralayıb.
"Dronarkotik ticarəti ilə məşğul olanlar havada üstünlüyə malikdir", deyə Kolumbiya prezidenti Qustavo Petro ötən ilin sonunda əsgərlər qarşısında çıxışında bildirib.
Təhlükədən qorunmaq üçün kasıb Kolumbiya böyük vəsait xərcləməyə məcburdur. Bu yaxınlarda ölkə hökuməti dronlara qarşı mübarizə avadanlıqlarına 1,6 milyard dollardan çox vəsait sərf edildiyini açıqlayıb.
Təhlükəsizlik xidmətinin əməkdaşlarından biri jurnalistlərə etiraf edib ki, antidron avadanlığı böyük ehtimalla ilk növbədə hədəfə çevriləcək. Bundan əlavə, belə sistemlər sabit enerji təchizatı və internetə çıxış tələb edir ki, Kolumbiyanın bir çox regionunda bununla bağlı problemlər var. Üstəlik, üsyançıların artıq optik liflə idarə olunan dronlardan istifadə etdiyi müşahidə olunub — onlara qarşı radioelektron mübarizə sistemləri ümumiyyətlə təsirsizdir.
Poliqon.info
