Meksikanın paytaxtı Mexikoda vəziyyət sakit olaraq qalır, şəhər küçələrində təhlükəsizlik tədbirlərinin görünən dərəcədə gücləndirilməsi müşahidə olunmur. AFN.az yerli mediaya istinadən xəbər verir ki, şəhər sakinləri adi bazar günü axşamında olduğu kimi, gəzintiyə çıxıblar, supermarketlər, ticarət mərkəzləri, kafe və restoranlar normal rejimdə işləyir.
Metropoliten və sürətli avtobus xətləri də daxil olmaqla ictimai nəqliyyat sistemi sərnişindaşımanı cədvəl üzrə həyata keçirir. Şəhərin mərkəzi istirahət zonalarında, o cümlədən Çapultepek parkında ailələr gəzir, muzeylər və küçə ticarəti fəaliyyətini davam etdirir. Gün ərzində paytaxtda heç bir insident qeydə alınmayıb.
Qeyd edək ki, Meksika Milli Müdafiə Nazirliyi bazar günü "Xalisko Yeni Nəsil" narkokartelinin başçısı, "El Menço" ləqəbli Ruben Oseqera Servantesin məhv edilməsi barədə açıqlama yayıb. Nazirliyin məlumatına görə, cinayətkar güc strukturları ilə silahlı toqquşma zamanı ağır yaralanıb və Mexikodakı hərbi hospitala hava yolu ilə aparılarkən ölüb.
Bu əməliyyatdan sonra Meksikanın bir neçə regionunda avtomobil yollarının kütləvi şəkildə bağlanması, maşınların və kommersiya müəssisələrinin yandırılması halları qeydə alınıb, lakin paytaxt hələlik bu iğtişaşlardan kənarda qalıb.
