ABŞ Prezidenti Donald Trampın Tehranı Vaşinqton üçün əlverişli nüvə sazişinin şərtlərini qəbul etməyə təşviq etmək və eyni zamanda tammiqyaslı müharibədən yayınmaq məqsədilə İrana qarşı məhdud hərbi zərbə variantını nəzərdən keçirdiyi bildirilir.
Hafta.az xəbər verir ki, bu barədə “The Wall Street Journal” mənbələrə istinadla yazıb. Məlumata görə, mümkün zərbə bir neçə gün ərzində həyata keçirilə və İranın hərbi, dövlət obyektlərini hədəf ala bilər.
Nəşrin iddiasına görə, əgər Tehran Vaşinqtonun uranın zənginləşdirilməsini dayandırmaq tələblərini yerinə yetirməzsə, ABŞ daha genişmiqyaslı hərbi kampaniya variantını da istisna etmir. Qəzet qeyd edir ki, Tramp hələlik hücumla bağlı yekun qərar verməyib. Ağ Evin mətbuat katibinin müavini Anna Kelly “The Wall Street Journal”a açıqlamasında bildirib:
“Yalnız Prezident Tramp nə edə biləcəyini və ya edə bilməyəcəyini bilir”.
Tramp cümə axşamı günü İranla razılığa gəlmək üçün maksimum 15 gün vaxtının olduğunu bəyan edib.
