İranın xarici işlər naziri Abbas Əraqçi Beynəlxalq Atom Enerjisi Agentliyinin (MAQATE) baş direktoru Rafael Qrossi ilə telefon danışığı apararaq, ABŞ-la nüvə məsələsi üzrə növbəti mərhələnin "çərçivə strukturu"nu müzakirə edib.
AFN.az xəbər verir ki, İran Xarici İşlər Nazirliyinin yaydığı məlumata görə, Əraqçi Qrossiyə Cenevrə danışıqlarındakı iştirakı üçün təşəkkür edib və rəsmi Tehranın Vaşinqtonla gələcək müzakirələri irəlilətmək istiqamətində razılaşdırılmış ilkin baza sənədi üzərində işlədiyini vurğulayıb.
MAQATE rəhbəri fevralın 17-də keçirilən məsləhətləşmələrin nəticələrini müsbət qiymətləndirərək, agentliyin danışıqlar gündəliyinin formalaşdırılmasına hər cür dəstək verməyə hazır olduğunu təsdiqləyib.
Xatırladaq ki, fevralın 17-də Cenevrədə Omanın vasitəçiliyi ilə ABŞ və İran arasında nüvə dosyesi üzrə ikinci raund dolayı danışıqlar baş tutub. Əraqçinin sözlərinə görə, tərəflər bir sıra məsələlər üzrə gələcək sazişin layihəsinə daxil edilə biləcək qarşılıqlı anlaşma əldə ediblər.
ABŞ-ın vitse-prezidenti Ceyms Devid Vens isə danışıqların bəzi aspektlərdə yaxşı keçdiyini, lakin Tehranın hələlik Ağ Evin irəli sürdüyü bəzi prinsipial mövqeləri qəbul etməyə tam hazır olmadığını bildirib. Növbəti görüşün yeri və vaxtı barədə hələlik rəsmi məlumat verilməyib.
