AMEA-nın rəqəmsal arxitekturasının ilkin modeli formalaşdırılıb
Bakı, 18 fevral, AZƏRTAC
Müasir dünyada rəqəmsal arxitekturanı qurmadan hər hansı inkişafa nail olmaq qeyri-mümkündür. Prezident İlham Əliyev tərəfindən bu istiqamətdə ardıcıl olaraq “Azərbaycan Respublikasının informasiya təhlükəsizliyi və kibertəhlükəsizliyə dair 2023 – 2027-ci illər üçün Strategiyası”, “Azərbaycan Respublikasında Rəqəmsal İnkişaf Konsepsiyası”, “Azərbaycan Respublikasının 2025–2028-ci illər üçün Süni İntellekt Strategiyası” və digər mühüm dövlət sənədləri qəbul olunub.
AMEA-dan AZƏRTAC-a bildirilib ki, bu sözləri AMEA-nın prezidenti akademik İsa Həbibbəyli Rəyasət Heyətinin iclasında söyləyib.
Milli Elmlər Akademiyasında da rəqəmsallaşma istiqamətində bir sıra əhəmiyyətli işlərin həyata keçirildiyini deyən akademik İsa Həbibbəyli AMEA rəhbəri seçilməsindən cəmi 3 ay sonra, 2023-cü ilin yanvar ayında Akademiyanın Rəyasət Heyətinin aparatında dövlətimizin və müasir dünyanın çağırışlarına uyğun olaraq, Elektron Akademiya şöbəsinin yaradıldığını diqqətə çatdırıb. Həmçinin həmin dövrdə AMEA-nın elmi müəssisə və təşkilatlarında da Elektron xidmətlər şöbələrinin yaradıldığını, ilkin olaraq kadr bazalarının formalaşdırıldığını söyləyib. Ötən müddət ərzində Akademiyada rəqəmsallaşma, süni intellekt texnologiyalarının tətbiqi, elektron xidmətlərin genişlənməsi istiqamətində bir çox uğurlar əldə olunduğunu xatırladan akademik İsa Həbibbəyli 2025-ci ilin sentyabr ayında Elektron Akademiya şöbəsinin adının Rəqəmsal Akademiya, süni intellekt və elektron xidmətlər” olaraq dəyişdirildiyini vurğulayıb.
“Bu, sadəcə şöbənin adının dəyişikliyi deyil, onun funksiyalarının, fəaliyyətinin, əhatə dairəsinin genişliyini ehtiva edir”, - deyən akademik İsa Həbibbəyli dövlətimizin başçısının AMEA-nın 80 illik yubiley yığıncağındakı nitqində rəqəmsallaşma, süni intellekt, kibertəhlükəsizliklə bağlı tapşırıqlarından və bu ilin 5 yanvarında yerli televiziya kanallarına müsahibəsi zamanı səsləndirdiyi fikirlərdən irəli gələrək, yanvarın 8-də AMEA-nın Rəyasət Heyətinin qərarı ilə elmi müəssisə və təşkilatlardakı Elektron xidmətlər şöbələrinin bazasında Rəqəmsal elm sahəsi və süni intellekt şöbələrinin yaradıldığını bildirib. Qeyd edib ki, həmçinin şöbələr köməkçi statusundan əsas şöbə statusuna keçirilib və artıq şöbələrin rəhbərliyində elmi işçilər təmsil olunur.
Görülən işlərlə AMEA-nın rəqəmsal arxitekturasının ilkin modelinin formalaşdırıldığını vurğulayan akademik İsa Həbibbəyli ikinci mərhələdə bu istiqamətdə kadr hazırlığı ilə bağlı fəaliyyət planının qurulacağını diqqətə çatdırıb.
