Görüşdə Yaxın Şərqdə gərginliyin azaldılması və əməkdaşlığın gücləndirilməsi müzakirə olunub...
Poliqon xəbər verir ki, Misir prezidenti Əbdülfəttah əs-Sisi Qahirədə Rusiyanın Xarici Kəşfiyyat Xidmətinin (SVR) direktoru Sergey Narışkini qəbul edib. Görüş zamanı regional və beynəlxalq gündəmin əsas məsələləri ətrafında fikir mübadiləsi aparılıb, Yaxın Şərqdə gərginliyin daha da dərinləşməsinin qarşısının alınması üçün Rusiya–Misir əməkdaşlığının möhkəmləndirilməsinin vacibliyi vurğulanıb.
Məlumata görə, əs-Sisi Qahirənin vasitəçilik səyləri barədə qonağı məlumatlandırıb və xüsusilə Qəzza zolağında atəşkəs razılaşmasının möhkəmləndirilməsinin əhəmiyyətini qeyd edib. Tərəflər regionda sabitliyin təmin olunması üçün diplomatik və təhlükəsizlik mexanizmlərinin gücləndirilməsinin zəruri olduğu qənaətində birləşiblər.
Görüşün yekununda Misir və Rusiya müvafiq qurumları arasında koordinasiyanın artırılması barədə razılıq əldə olunub. Bu addımın regional və qlobal böhranların sülh yolu ilə həllinə töhfə verməsi məqsədi daşıdığı bildirilib.
Poliqon.info
