Əlilliyi olan şəxslərin əl işləri bu saytda satışa çıxarılacaq RƏSMİ AÇIQLAMA VİDEO

Avtosfer portalından verilən məlumata əsasən, ain.az bildirir.

DOST İnklüziv İnkişaf və Yaradıcılıq Mərkəzində həssas qrupların yaradıcı potensialının inkişafı, sosial reabilitasiyası və cəmiyyətə inteqrasiyasına dair ötən ilin yekunları və 2026-cı ilin hədəflərinə dair mətbuat konfransı keçirilib.

Mərkəzin direktoru Elnarə Ənsari çıxış edərək bildirib ki, ölkədə həyata keçirilən sosial siyasətin əsas məqsədi Azərbaycan vətəndaşının sosial təminatının gücləndirilməsi və rifahının yaxşılaşdırılmasıdır. O vurğulayıb ki, Mərkəzin fəaliyyəti inklüziv və sosial ədalətə əsaslanan cəmiyyətin formalaşdırılması istiqamətində aparılan davamlı işlərin uğurlu nəticəsidir.

Direktor həmçinin Mərkəzin 2021-ci ildən fəaliyyət göstərdiyini, açılışında Prezident İlham Əliyev, Birinci vitse-prezident Mehriban Əliyeva və qızları Leyla Əliyevanın iştirak etdiyini xatırladıb. O deyib ki, Mərkəz Birinci vitse-prezident Mehriban Əliyevanın təşəbbüsü ilə yaradılıb və həssas qrupların bacarıqlarının inkişafı, məşğulluq imkanlarının artırılması məqsədi daşıyır.

Konfransda “dostart.az” platforması da təqdim olunub. Qeyd edilib ki, platforma vasitəsilə əlilliyi olan şəxslərin əl işləri satışa çıxarılacaq, gəlirlərdən yalnız 2% vergi tutulacaq. Hazırda portala 250-yə yaxın məhsul daxil edilib, Azərbaycan, rus və ingilis dillərində məlumatlar yerləşdirilib, görmə məhdudiyyətli və disleksiya xəstələri üçün “Müyəssərlik menyusu” quraşdırılıb.

Layihənin bir il ərzində pilot şəklində həyata keçiriləcəyi, gələcəkdə daha çox həssas qrupun platformaya cəlb olunacağı bildirilib. Layihənin dizayn və proqram təminatı DOST Rəqəmsal İnnovasiyalar Mərkəzinə, texniki dəstək və ödəniş həlləri isə “CIBPAY” və “CIB BUSINESS” MMC-lərə məxsusdur.

Konfransda həmçinin Mərkəzin ölkə daxilində və beynəlxalq səviyyədə tanıdılması istiqamətində görülən işlər və 2026-cı ilin hədəfləri barədə məlumat verilib, media nümayəndələrinin sualları cavablandırılıb.

Nurcan Babək