Aloe vera tərkibindəki vitaminlər, minerallar və bioaktiv maddələr sayəsində həm tibbdə, həm də kosmetologiyada geniş istifadə olunan bitkilərdən biridir.
Pravda.az bildirir ki, “Yaşıl aptek” kimi tanınan aloe xüsusilə dəri və həzm sistemi üçün faydaları ilə diqqət çəkir.
Mütəxəssislərin fikrincə, aloe veranın geli yanıq, yara, dəri qıcıqlanması və həşərat sancmalarında sakitləşdirici və bərpaedici təsir göstərir. Antiinflamatuar və antiseptik xüsusiyyətləri sayəsində dermatit, sədəf və dəri quruluğu kimi problemlərdə də istifadə olunur. Aloe eyni zamanda dərini nəmləndirir, qızartını azaldır və xarici təsirlərə qarşı qoruyucu rol oynayır.
Bitkinin düzgün və ölçülü istifadəsi həzm sisteminin fəaliyyətini də dəstəkləyə, bağırsaq hərəkətlərini tənzimləyə və qəbizliyi yüngülləşdirə bilər. Bəzi araşdırmalara görə, aloe qan şəkəri və xolesterol səviyyəsinin balanslaşdırılmasına da kömək edə bilər.
Lakin mütəxəssislər aloe veranın nəzarətsiz istifadəsinin risklər yarada biləcəyini vurğulayır. Fərdi həssaslıq və allergik reaksiyalar mümkündür. Hamilə və süd verən qadınlara, həmçinin böyrək, qaraciyər və ürək-damar xəstəlikləri olan şəxslərə aloe tərkibli məhsullardan istifadə etməzdən əvvəl həkimlə məsləhətləşmək tövsiyə olunur. Ağızdan həddindən artıq qəbul edildikdə isə ishal, mədə-bağırsaq narahatlığı və elektrolit balansının
pozulması müşahidə oluna bilər.
Əminə Bayramova
