ABŞ jurnalisti Moskvanın resursları, istehsal gücü və hərbi potensialını Vaşinqton üçün strateji üstünlük adlandırır…
Poliqon xəbər verir ki, amerikalı mühafizəkar jurnalist Taker Karlson Rusiyanın ABŞ üçün ən sərfəli mümkün müttəfiq ola biləcəyini bəyan edib. O, fikirlərini sosial şəbəkə X-də paylaşaraq, “America First” prizmasından yanaşdıqda, Rusiya ilə əməkdaşlığın ABŞ üçün açıq şəkildə ən məntiqli variant olduğunu vurğulayıb.
Karlson qeyd edib ki, Rusiya dünyanın ən böyük əraziyə malik dövləti olmaqla yanaşı, nəhəng mineral ehtiyatlara, enerji, neft, qaz və qızıl resurslarına sahibdir. Onun sözlərinə görə, Moskvanın böyük istehsal gücü və Avropanın ən böyük ordusu Vaşinqton üçün potensial strateji üstünlük hesab oluna bilər. Jurnalist iddia edib ki, Rusiya müəyyən beynəlxalq münaqişələrdə ABŞ-a dəstək göstərə biləcək gücdədir.
Bu açıqlama ABŞ-nin yenilənmiş milli təhlükəsizlik strategiyası fonunda diqqət çəkir. Kremlin sözçüsü Dmitri Peskov sənədi şərh edərkən bildirib ki, prezident Donald Tramp administrasiyasının Moskva ilə bağlı yanaşması əvvəlki ABŞ rəhbərlərinin, o cümlədən sabiq prezident Co Baydenin mövqeyindən kəskin şəkildə fərqlənir. Yeni strategiyada Rusiya artıq “birbaşa təhdid” kimi göstərilmir, əvəzində strateji sabitlik sahəsində əməkdaşlığa çağırış yer alır.
Karlsonun açıqlaması ABŞ siyasi dairələrində Rusiya ilə münasibətlərə dair davam edən geniş müzakirənin bir hissəsi hesab olunur. Onun fikirlərinin Tramp administrasiyasının ritorikası ilə üst-üstə düşməsi ekspertlər tərəfindən diqqətlə izlənir.
Poliqon.info
