Dövlət–Özəl Sektor–QHT Platforması çərçivəsində 9 dekabr tarixində Bakıda keçirilən Forumun III panelində Hemofiliyalı Xəstələrin Respublika Assosiasiyasının İdarə Heyətinin sədri Ayaz Hüseynov slayd təqdimatı ilə çıxış edərək hemofiliya xəstəliyi, görülən işlər və mövcud problemlər barədə geniş məlumat verib.
QHT.az xəbər verir ki, Ayaz Hüseynov bildirib ki, hemofiliya nadir və ağır qan xəstəliyidir. Xəstəlik qanın laxtalanma pozğunluğu ilə müşahidə olunur və hətta cüzi travmalar belə daxili və xarici güclü qanaxmalara səbəb ola bilər:
"Düzgün müalicə aparılmazsa, xəstələr gənc yaşlarda əlilliklə üzləşə, hətta həyatlarını itirə bilərlər. Hemofiliyalı Xəstələrin Respublika Assosiasiyası 1997-ci ildə yaradılıb və hazırda 30 ilə yaxın fəaliyyət tarixinə malikdir. İlkin illərdə əsas məqsəd pasiyentlərin məlumat bazasının yaradılması olub, 2004-cü ilə qədər ölkədə real pasiyent sayı barədə dəqiq statistika mövcud olmayıb. Hazırda isə Azərbaycanda 1700-ə yaxın hemofiliyalı pasiyent rəsmi qeydiyyatdadır".
Ayaz Hüseynov çıxışı zamanı Assosiasiyanın dövlət qurumları ilə əməkdaşlığının sistemli şəkildə qurulduğunu da vurğulayıb:
"Dövlət səhiyyə qurumlarının rəhbərləri ilə mütəmadi görüşlər keçirilir və hemofiliya xəstələrinin müalicəsinin təkmilləşdirilməsi məqsədilə fəaliyyət planının strategiyası hazırlanır. Bu istiqamətdə atılan addımların tibbi xidmətlərin keyfiyyətinin yüksəldilməsinə və pasiyentlərin həyat şəraitinin yaxşılaşdırılmasına xidmət edir. Son illər TƏBİB, İcbari Tibbi Sığorta üzrə Dövlət Agentliyi və Səhiyyə Nazirliyi ilə sıx əməkdaşlıq qurulub. Bu əməkdaşlıq çərçivəsində pasiyentlərin müalicə imkanlarının genişləndirilməsi istiqamətində mühüm addımlar atılır".
"28 Fevral – Nadir Xəstəliklər Günü 2021-ci ildən etibarən Azərbaycanda da aktiv şəkildə qeyd olunmağa başlanıb. Bu çərçivədə müxtəlif nadir xəstəliklər ictimai müzakirəyə çıxarılıb. Aparılan müşahidələr və beynəlxalq statistika göstərir ki, Azərbaycanda nadir xəstəliklərin yayılma faizi bir sıra ölkələrlə müqayisədə daha yüksəkdir. Məhz bu faktlar əsasında Assosiasiyanın təklifləri nəzərə alınaraq ötən il qanunvericiliyə mühüm dəyişikliklər edilib. Bu münasibətlə cənab Prezidentə təşəkkürümüzü bildiririk", - deyə əlavə edib.
Assosiasiya sədri bildirib ki, 17 Aprel – Dünya Hemofiliya Günü hər il Azərbaycanda qeyd olunur, bu çərçivədə həkimlər və tibb işçiləri üçün elmi konfranslar təşkil edilir:
"Hemofiliyanın müalicəsində fizioterapiya xüsusi əhəmiyyət daşıyır, çünki oynaqdaxili qanaxmalar ciddi fəsadlar yarada bilər və bu fəsadların aradan qaldırılması üçün davamlı reabilitasiya vacibdir. Assosiasiya Lənkəran, Füzuli, Göyçay, Quba, Zaqatala və digər bölgələrdə də fəal şəkildə tədbirlər və maarifləndirmə işləri aparır".
Pərvanə Fərhadqızı
