Ramiz Mehdiyev mövzusu bir azdan elə gizlinləri, elə simasız və yaramaz insanların iç üzünü açacaq ki, çoxlarının əli üzündə qalacaq. Heyrətdən. İnanın...
Hər halda belə düşünməyə ciddi əsaslar var və ipin ucu da artıq görünməyə başlayıb..
Mən isə bir neçə məqamın üzərində xüsusi dayanacam.
Əvvəla, o insanlar ki vardı ha, deyirdilər, ay Ramiz Mehdiyevin xəyanət planının üstünü Rusiya açdı, ay dosyeni Azərbaycana Putin verdi, ay filan, ay feşməkan - mən hələ də həmin kəslərin sadəlövhlüyünə təəccüb edirəm. Və ya: Azərbaycan dövləti o qədərmi zəifdir, o qədərmi acizdir ki, ona kimsə məlumat versin, ya da dosye təqdim eləsin?! Yox, əlbət!
Ayrıca, Mehdiyevin (keçmiş) vəkilləri avqust ayında çıxarılmış məhkəmə qərarından (təfərrüatlar mətbuatda gedib) apellyasiya şikayəti verməklə əslində bir çox mətləblərə aydınlıq gətirdilər. Sadəcə, özləri fərqinə varmadan. Və beləcə aydınlaşdı ki, mövzu yeni deyil, köhnədir və PA-nın eks rəhbərinin destruktiv fəaliyyəti də daha öncədən nəzarətdə olub. Eyni zamanda mən, hüquqşünas təcrübəmə əsaslanaraq deyə bilərəm ki, məlum masştabda olan cinayətlərin əsas subyektləri (çevrəsi, həndəvəri) - cinayət işi açılandan sonra müəyyənləşmir, tam əksi: (90 faiz etibarilə) həmin subyekt (çevrə, həndəvər) dəqiq və tutarlı sübutlarla tam müəyyənləşəndən sonra prosesə start verilir və aidiyyatı üzrə cinayət işi açılır.
Sözümün "mustafası” isə budur: Ramiz Mehdiyevin "nadanlıq səlnaməsi”, eyni zamanda bu xəyanətkara biət edənlər, ondan tapşırıq alanlar, "boz kardinal”ın bağında, evində, ofisində sülənənlər barədə hüquq - mühafizə orqanları lap çoxdan məlumatlı olub. Sadəcə dövlət, uyğun zaman gözləyib və gedişatı bir müddət kənardan müşahidə etməyə üstünlük verib. Ki, az öncə yuxarıda vurğuladığım 90 faizin yerdə qalan 10 faizi – yəni, "staj”lı tülkülər də girdikləri dəlikdən bayıra çıxsınlar, ifşa olsunlar və məsuliyyətdən yayına bilməsinlər.
İkincisi...Yəqin xatırlayarsız, Mehdiyev artıq Akademiyadan gethaget vaxtlarında bizim ən kiçik açıqlamalarımıza belə dərhal reaksiya verirdi və çalışdığı qurumun saytını az qala öz "bloq”una çevirmişdi. İndi isə susur. Niyə görəsən?! Cavab sadədir: Çünki, bu dəfə pis yerdən "ilişib”, dalana dirənib və eyniadlı səbəbdən də bütün manevr imkanlarını itirib.
Üçüncüsü...Çox maraqlıdır ki, "Mehdiyev olayı” siyasi gündəmi silkələdiyi andan ta bu günə qədər nə radikal müxalifətin, nə də "söyüş müxalifəti”nin nümayəndələri "boz kardinal” haqda ən xırda tənqid belə söyləməyiblər. Yəni, ən azından mən eşitməmişəm. Əksinə, imkan düşdükcə onu müdafiə ediblər və bütün mümkün vasitələrlə Mehdiyevi qorumağa çalışıblar.
Səbəb?!
Dördüncüsü...Gəzən, fəqət, hələ rəsmi təsdiqini tapmayan söhbətlərdən biri də odur ki, Mehdiyev Rusiya - Ukrayna müharibəsindən sonra şimal qonşumuzun öz "sərt” üzünü Qafqaz tərəfə çevirəcəyini düşünərək ani hərəkətə keçib və bu minvalla xüsusi təxribat planı hazırlayıb.
Deyim, tam da inandırıcıdır! Nədən? Ona görə ki, bu adam işdən qovulduğu andan etibarən eynən radikallar kimi düşünüb, onlar kimi fürsət, məqam gözləyib və mövcud iqtidardan "işsız qalmağının” acığını çıxmağa çalışıb. Üstəlik, bunu açıq şəkildə də bəlli edib!
Amma hara qədər, ay Ramiz?! Kimlə, ay Ramiz?! Necə, ay Ramiz?!
Əli Kərimliyləmi? Qabilləmi? Gültəkinləmi? Abbaslamı? Üzərimizə yönəltdiyin 3-5 trollamı?
***
Kərimli demişkən... Axtarış apardılar, dindirdilər və yəqin, detallar, təfsilatlar da çox keçməz, bəlli olar..
Üstəlik, aydın məsələdir ki, istintaq orqanı bu addımı elə - belə atmayıb və mövzu da heç şübhəsiz, Fuad Qəhrəmanlının iddia etdiyi təfərrüatlardan daha dərindir.
Və...Bir azdan elə videolar, audiolar, sənədli - sübutlu detallar ortalığa çıxsın ki...Siz də baxın.
Göz oxşayacaq, göz!
Çünki, əminəm:
Ən azından "Ziyalılar Forumu” və "Milli Şura” adlanan 2 təxribatçı qurum Mehdiyevlə bir şəkildə əlaqəli olub.
Qaragüruhun mitinqlərindəki adam sayı (illər boyunca) birbaşa Mehdiyev tərəfindən "tənzimlənib”.
Əli Kərimli Ramiz Mehdiyevlə hardasa, necəsə (fəqət, yüzəyüz!) separat görüşlər keçirib.
Hətta....Çox güman ki, dünən AXCP sədrinin evindən tapılan məktubun mətnini də Əli Kərimli şəxsən redaktə edib və daha sonra "lazımlı” ünvana göndərib.
***
Bax belə.
Mehdiyev Rusiyaya "ayı”, Kərimli və onunkimilərə isə "dayı” xidməti göstərməyə çalışırdı...
Amma, sonucda istifadə edənin də, olunanın da eyni anda yapışdığı ip elə yerdən qırıldı ki, hamısı kom şəklində kəllə - mayallaq getdilər və muncuq kimi sağa - sola səpələndilər.
Zatən, 87 yaşlı "marazmatik”lə 60 yaşlı nağılbazın ittifaqı bundan artıq "perspektiv” vəd edə bilməzdi...
Elşən Musayev, Milli Məclisin deputatı, Demokratik Maarifçilik Partiyasının sədri.
