Ramiz Mehdiyevin Əli Kərimli ilə səhnəarxası siyasi koordinasiya cəhdləri Azərbaycan siyasətində köhnə üsulların yenidən canlandırılması kimi qiymətləndirilə bilər. Bu yaxınlaşma açıq şəkildə göstərir ki, hər iki fiqur ölkənin milli maraqlarını və inkişafını deyil, şəxsi və qrup maraqlarını önə çəkən siyasi davranış nümayiş etdirir. Uzun illər dövlət idarəçiliyində mühüm mövqedə olmuş Ramiz Mehdiyevin radikal müxalifətlə təmaslara can atması da məhz bu şəxsi ambisiyaların davamı kimi görünür.
Bu sözləri Modern.az-a açıqlamasında deputat Vasif Qafarov bildirib.
O qeyd edib ki, uzun müddət xarici anti-Azərbaycan dairələrin təsiri altında fəaliyyət göstərən, onların siyasi sifarişlərini yerinə yetirən Əli Kərimli və onunla eyni xəttə xidmət edən digər “milli” satqınlar son beş ildə Azərbaycanın qazandığı tarixi qələbələrin heç birinə sevinc göstərməyiblər.
“Əksinə, bu uğurlara kölgə salmaq, xarici mərkəzlərin maraqlarına uyğun fəaliyyət göstərmək üçün bütün imkanlardan istifadə ediblər. Azərbaycan cəmiyyəti isə onların kimliyini çoxdan tanıyıb və onları siyasi proseslərin kənarında saxlayıb. Cəmiyyətdən dəstək ala bilməyən Əli Kərimli ümidini indiyədək onu maliyyələşdirən və yönləndirən xarici anti-Azərbaycan dairələrə bağlayıb, lakin bu ümidlər özünü doğrultmadıqca o, yeni himayədar axtarışlarına davam edir”.
“Guya “xalq uğrunda mübarizə apardığını” iddia edən Əli Kərimlinin vaxtilə sərt şəkildə tənqid etdiyi Ramiz Mehdiyevlə indi siyasi dil tapması onun ideoloji xəttinin situativ, dəyişkən və qeyri-prinsipial olduğunu bir daha nümayiş etdirir. Bu yaxınlaşmada cəmiyyətə fayda verə biləcək heç bir müsbət niyyət yoxdur. Əksinə, “hakimiyyətə qarşı kimlə olsaq, olar” yanaşması üzərində qurulan bu xətt ölkə üçün potensial destruktiv nəticələrə yol aça bilər”, - deyə V. Qafarov vurğulayıb.
“Məhz bu fonda Dövlət Təhlükəsizliyi Xidmətinin Əli Kərimlinin evində axtarış aparması və onu dindirməsi təsadüfi deyil. Bu addımın atılması üçün kifayət qədər əsaslar mövcuddur və DTX-nin rəsmi açıqlamalarına görə, axtarışlar Ramiz Mehdiyev barəsində aparılan istintaq çərçivəsində həyata keçirilir. Hazırda iki şəxs arasında mümkün əlaqələr araşdırılır, toplanan materiallar dövlət təhlükəsizliyi baxımından qiymətləndirilir və bütün istiqamətlər üzrə istintaq aparılır”.
Deputatən sözlərinə görə, bu proseslərin fonunda cəmiyyəti ən çox narahat edən məqam siyasi manipulyasiyaların, xüsusilə də xarici təsirlərə açıq davranış modellərinin mövcudluğudur. Regionda son illər yaşanan geosiyasi təlatümlər, böyük güclərin Qafqazda nüfuz savaşı fonunda hər hansı siyasi qruplaşmanın bu təsirlərə uyğun mövqe sərgiləməsi dövlət üçün ciddi risk hesab olunur. Elə buna görə də radikal müxalifət daxilində dövlət maraqları ilə ziddiyyət təşkil edən davranışlar cəmiyyət tərəfindən dəfələrlə sərt tənqid edilib.
“Qafqaz regionunun hazırkı həssas geosiyasi mühitində daxili siyasi qrupların hansı xarici mərkəzlərə açıq olması məsələsi xüsusi diqqət tələb edir. Dövlət təhlükəsizliyi təhdidlərinin artdığı bir dövrdə kənar təsirlərlə manipulyasiya oluna biləcək strukturların vaxtında zərərsizləşdirilməsi ən prioritet məsələlərdən biridir. Çünki hər hansı siyasi qüvvənin avantürist məqsədlərlə istifadə edilməsi ölkənin stabilliyinə ciddi zərbə vura bilər.
Bütün bu kontekstdə Ramiz Mehdiyev və Əli Kərimli arasında mümkün əlaqələrin araşdırılması, faktların obyektiv qiymətləndirilməsi və dövlət təhlükəsizliyi üçün yarana biləcək risklərin aradan qaldırılması dövlətin üzərinə düşən əsas öhdəliklərdəndir. Azərbaycan cəmiyyəti artıq xarici anti-Azərbaycan dairələrin əlində oyuncaq olan “milli” satqınların gizli planlarından, intriqalarından və radikal çağırışlarından yorulub. Dövlətin sabitlik və inkişaf xəttinə qarşı yönəlmiş hər hansı fəaliyyətin vaxtında neytrallaşdırılması isə həm milli maraqların, həm də ictimai təhlükəsizliyin qorunması baxımından zəruridir.
Bu gün Azərbaycan dövləti heç vaxt olmadığı qədər güclü və qüdrətlidir. Dövlət öz milli və dövlət maraqlarına qarşı yönələn hər bir təhlükəni vaxtında dəf etmək gücünə malikdir və kimin adından asılı olmayaraq – Ramiz Mehdiyev, Əli Kərimli və ya xarici anti-Azərbaycan dairələrin maraqlarına xidmət edən istənilən digər şəxs – onların fəaliyyətinə hüquqi qiymət veriləcək”, - deyə deputat qeyd edib.
