Bu gün səhər saatlarından Dövlət Təhlükəsizliyi Xidməti (DTX) Azərbaycan Xalq Cəbhəsi Partiyasının (AXCP) sədri Əli Kərimlinin evində axtarış aparır. Rəsmi məlumatda bildirilib ki, axtarış Prezident Administrasiyasının sabiq rəhbəri, hazırda ev dustaqlığında saxlanılan Ramiz Mehdiyevin cinayət işi üzrə aparılan istintaqla bağlıdır.
“Qafqazinfo”nun əldə etdiyi məlumata görə, istintaq hazırda Ramiz Mehdiyevlə Əli Kərimli arasında cinayət məsuliyyəti yaradan əlaqələri araşdırır. Bu istiqamətdə müstəntiqlər tərəfindən çoxsaylı dəlil və sübutların toplandığı bildirilir.
Əsas diqqət çəkən məqamlar arasında Ramiz Mehdiyevin bir müddət əvvəl Rusiyaya göndərdiyi məktubun məzmunu dayanır. Həmin məktubun təhlili zamanı Mehdiyevlə Kərimli arasında münasibətlərdən bəhs edildiyi və bu əlaqələrin istintaq üçün önəmli olduğu təsdiqlənib.
İstintaqa yaxın mənbələr “boz kardinal” kimi tanınan Ramiz Mehdiyev ilə Əli Kərimlinin vaxtaşırı gizli görüşlər keçirdiyini, məxfi məlumat mübadiləsi apardığını və rabitə kanalları vasitəsilə məlumat ötürdüyünü bildirirlər. Cinayət işində bu epizodlara dair materialların da yer aldığı deyilir.
Daha əvvəl Mehdiyevin vəkilləri tərəfindən həmin məlumatların toplanmasına dair qərardan apellyasiya şikayəti verilsə də, qəbul edilməyib. Məlumata görə, Rusiya-Ukrayna müharibəsindən sonra bölgədə geosiyasi vəziyyət dəyişərsə, həmin planların yenidən aktuallaşması mümkündür.
Bununla əlaqədar, dövlət qurumlarında belə bir fikir formalaşıb ki, müharibədən sonra Rusiyanın Qafqazda təsirini artırmaq cəhdləri fonunda Mehdiyevin təlimatlandırdığı və radikal mövqeyi ilə seçilən AXCP-nin də proseslərdə istifadə olunması istisna edilmir.
Bu səbəbdən, mənbələr hesab edir ki, dövlət təhlükəsizliyi üçün risk yaradan fəaliyyətlərin qarşısının alınması məqsədilə AXCP-nin fəaliyyəti üzrə araşdırmaların genişləndirilməsi vacibdir.
Qeyd edək ki, Ramiz Mehdiyevin barəsindəki cinayət işi üzrə ibtidai istintaq davam edir. O, dövlətə xəyanət, dövlət hakimiyyətini ələ keçirməyə yönələn hərəkətlər və cinayət yolu ilə əldə edilmiş əmlakı leqallaşdırma maddələri ilə ittiham olunur. Barəsində ev dustaqlığı qətimkan tədbiri seçilib.
