İran Futbol Federasiyası bildirib ki, ABŞ hökumətinin heyətin bəzi üzvlərinə viza verməməsi səbəbindən gələn həftə Vaşinqtonda keçiriləcək Dünya Kuboku final mərhələsinin püşkatmasında iştirak etməməyi qərara alıb.
Federasiya sözçüsü Əmir Mehdi Ələvi dövlət televiziyasına açıqlamasında qərarın idmanla bağlı olmadığını FIFA-ya bildirdiklərini və İran heyətinin püşkatmada iştirak etməyəcəyini vurğulayıb.
Ələvi “Futbol Federasiyası son iki gündə FIFA Prezidenti Canni İnfantino və FIFA Baş Katibliyi ilə rəsmi yazışmalar aparıb və məsələ rəsmi olaraq onlara çatdırılıb. FIFA-nın cavabı da bu qurumun məsələni izlədiyini göstərir” deyib.
İran mətbuatı bildirirdi ki, Federasiya Prezidenti Mehdi Tac da daxil olmaqla bəzi heyət üzvlərinə ABŞ tərəfindən viza verilməyib. Tac dünən açıqlamasında qərarın siyasi olduğunu düşündüklərini və bu məsələni FIFA Prezidenti Gianni İnfantino ilə paylaşdıqlarını qeyd edib.
Qeyd edək ki, ABŞ 2026 Dünya Kubokuna Kanada və Meksika ilə birgə ev sahibliyi edəcək.
