Ankara həm Ukraynanın suverenliyini, həm də diplomatik həll yollarını dəstəkləyir...
Poliqon xəbər verir ki, Türkiyə Prezidenti Rəcəb Tayyib Ərdoğan Ukrayna Prezidenti Volodimir Zelenski ilə birgə mətbuat konfransında Ankaranın Ukrayna münaqişəsinin siyasi yolla həllinə dair bütün konstruktiv təşəbbüsləri dəyərləndirməyə hazır olduğunu bildirib. O vurğulayıb ki, əgər Rusiya tərəfindən ədalətli və davamlı sülhə yol açacaq təkliflər irəli sürülərsə, Türkiyə bu barədə dialoqa açıqdır.
Ərdoğan çıxışı zamanı qeyd edib ki, Ankara Ukraynanın suverenliyinə və ərazi bütövlüyünə dəyişməz dəstək göstərir. Onun sözlərinə görə, bölgədə sülhün bərqərar olması yalnız beynəlxalq hüquqa uyğun qərarların tətbiqi ilə mümkündür. “Biz Ukraynanın müstəqilliyinə və sərhədlərinin toxunulmazlığına hörmət edirik və bunu dəyişməz prinsip kimi qəbul edirik,” – deyə Türkiyə lideri bildirib.
Mətbuat konfransında iki ölkə lideri təhlükəsizlik əməkdaşlığı, Qaradeniz regionunda sabitlik, humanitar məsələlər və enerji layihələri də daxil olmaqla geniş spektrli mövzuları müzakirə edib. Ərdoğan bildirib ki, Türkiyə həm Ukrayna, həm də Rusiya ilə dialoqun davam etdirilməsinin münaqişənin daha geniş miqyasda alovlanmasının qarşısını aldığını düşünür.
Ekspertlər hesab edirlər ki, Ankara özünü həm Moskva, həm də Kiyev üçün etibarlı vasitəçi kimi möhkəmləndirməkdə davam edir. Xüsusilə taxıl sazişi, əsir mübadiləsi və humanitar dəhlizlər kimi sahələrdə Türkiyənin əvvəlki təşəbbüsləri onun diplomatik rolunu daha da gücləndirib.
Bununla belə, münaqişənin kəskinləşdiyi bir dönəmdə Ankara üçün balanslı siyasəti qorumaq həm strateji üstünlüklər, həm də risklər yaradır. Türkiyənin həm NATO üzvü, həm də Rusiya ilə geniş iqtisadi və enerji əlaqələrinə malik olması bu diplomatik xətti daha da həssas edir.
Poliqon.info
