Ukraynanın İzmail Limanında lövbər salan Türkiyə bayrağı altında üzən ORINDA maye qaz gəmisinə dron hücumu edilib.
Hafta.az-ın yazdığına görə, hücum nəticəsində gəmidə yanğın baş verib, lakin 16 türk heyət üzvü təhlükəsiz şəkildə təxliyə edilib.
Nəqliyyat və İnfrastruktur Nazirliyinin Dənizçilik Baş İdarəsi rəsmi açıqlama yayaraq bildirib: "16 türk heyət üzvünü daşıyan Türkiyə bayrağı altında üzən ORINDA maye qaz gəmisi Ukraynanın İzmail Limanında təxliyə edilərkən vurulub və alovlanıb. Heyət gəmini təhlükəsiz şəkildə tərk edib. Xəsarət alan yoxdur".
Türkiyənin Odessadakı baş konsulu Muhittin Çelik yanğının qarşısını almaq üçün səylərin davam etdiyini, lakin partlayış riskinin qaldığını bildirib. Çelik deyib: "Maye qazın üçdə ikisi hələ də gəmidədir. İzmail yanğınsöndürmə idarəsi alovu su ilə söndürərək gəmini soyutmağa çalışır. Partlayış riski səbəbindən limanda təhlükəsizlik tədbirləri artırılıb".
Hücumun təsirləri qonşu Rumıniyaya da təsir etdi. Rumıniya hakimiyyəti gəmidəki tezalışan yük səbəbindən Ukrayna sərhədinə yaxın bir kəndi boşaltmaq qərarına gəldi.
Ukrayna rəsmiləri hücumların bölgədəki enerji və liman infrastrukturuna da zərər verdiyini açıqladılar. Ərazidə 36500-dən çox evin elektrik enerjisindən məhrum qaldığı, liman avadanlıqları və digər mülki gəmilərin də zədələndiyi bildirilir.
Rusiya hadisə ilə bağlı heç bir rəsmi açıqlama verməsə də, Türkiyədən texniki qrupun gəminin vəziyyətini qiymətləndirəcəyi və yenidən suya buraxıla biləcəyini müəyyən edəcəyi bildirilib.
