Füzuli Rayon Məhkəməsində mənimsəmədə təqsirləndirilən Yusif Bəşirovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Elmir İsmayılovun sədrliyi ilə keçirilən prosesdə hökm oxunub.
Məhkəmənin hökmü ilə ona 1 il müddətinə azadlığın məhdudlaşdırılması (elektron qolbaq) cəzası təyin edilib.
İttihama görə, Yusif Bəşirov “Azərşəkər” MMC-nin törəmə müəssisəsi olmaqla Füzuli rayonu, Qayıdış-5 qəsəbəsi ərazisində yerləşən Füzuli Aqroparkını idarə edən MMC-lərdən birində bağban vəzifəsində çalışıb. O, şirkətin 50 top damlama borusunu 2024-cü ilin dekabr ayı ərzində ayrı-ayrı vaxtlarda axşam saatlarında istifadəsində olan “Mercedes” markalı avtomobillə bir neçə dəfə gizli şəkildə apararaq evin həyətinə gətirib. Sonra 2025-ci ilin yanvar ayının əvvəllərində təqsirləndirilən şəxs həmin boruları Xaçmaz rayonundan olan cinayətin törədilməsindən məlumatsız olan şəxslərə satıb.
Beləliklə, Yusif şirkətin ümumilikdə 13 039 manat dəyərində əmlakını talayaraq mənimsəyib.
Kamal Məmmədov
